Wilaya ya Nanyumbu yaadhimisha siku ya upandaji miti.

Posted on: March 22nd, 2018

Mkuu wa Wilaya ya Nanyumbu Mh. Selemani Mzee akipanda miti katika Shule ya Msingi Nahawara wilayani Nanyumbu katika kuadhimisha siku ya upandaji miti kitaifa iliyoongozwa na kauli mbiu isemayo"TANZANIA YA KIJANI INAWEZEKANA, PANDA MITI KWA MAENDELEO YA VIWANDA". Mh. Selemani Mzee amewataka wananchi kuwa na utamaduni wa kupanda miti aina mbalimbali ili kuhifadhi mazingira, kupata malighafi kwa ajili ya viwanda ikiwa ni pamoja na matunda. Aidha, katika maagizo yake kwa wananchi na watendaji wa Serikali, Mkuu wa Wilaya ameikemea tabia iliyokithiri ya uchomaji moto misitu. Mkuu wa Wilaya ameagiza kutafutwa na kukamatwa kwa mtu yeyote atakaye jihusisha katika uharibifu wa mazingira na hasa uchomaji moto wa misitu.

Lengo la Wilaya ya Nanyumbu kwa Mwaka 2018 ni kupanda miti milioni moja na laki tano (1,500,000). Miti hii tayari imeshaanza kupandwa na Halmashauri, TASAF pamoja na wadau wengine ikiwemo mwananchi mmoja mmoja. Kijiji cha Nahawaha kimeendelea kung'ara mbele ya Mkuu wa Wilaya kutokana na kufanya vizuri katika ujenzi wa madarasa mapya, vyoo na ofisi za Walimu.