UZIDUZI WA BARAZA LA MADIWANI WILAYA YA NANYUMBU WAFANYIKA KWA AMANI NA UTULIVU.

Posted on: December 2nd, 2025

Na, Ofisi ya Mwasiliano Serikalini..

Baraza jipya la Madiwani wa Halmashauri ya Wilaya ya Nanyumbu limezinduliwa rasmi tarehe 2 Desemba 2025 katika ukumbi wa Shule ya Wasichana Mkapa. huku viongozi mbalimbali waliohudhuria hafla hiyo wakitoa Pongezi na  maelekezo mahsusi kuhusu utekelezaji wa shughuli za serikali na wajibu wa madiwani katika usimamizi wa shughuli za wananchi..

Mapema, akizindua mkutano huo maalum, Katibu Tawala wa Wilaya, Ndugu Juma Kanyinda, aliwaasa madiwani wapya kutambua jukumu kubwa lililo mbele yao: kuhakikisha halmashauri inasonga mbele kwa kusimamia uwajibikaji na kuboresha huduma kwa wananchi.

Aidha, alimtangaza rasmi Mhe  Benjamin R, Masimbo (Diwani wa Kata ya Masuguru) kuwa Mwenyekiti wa Halmashauri, na Mhe. Shafii Mnaunda, (Diwani wa Kata ya kilimanihewa ) kuwa Makamu Mwenyekiti wa Halmashauri, walioteuliwa kwa kura za madiwani katika uzinduzi huo.

Kwa upande wake, Mkuu wa Wilaya ya Nanyumbu, Mhe. Christopher Magala, alisisitiz

dhima ya uwajibikaji na mshikamano kati ya madiwani na watendaji wa kata. Aliwataka madiwani kuwaelimisha vijana kujiepusha na makundi maovu na badala yake kujikita katika shughuli za kiuchumi na maendeleo.

 “Kasimamieni kwa dhati huduma za wananchi kama afya, elimu na usimamizi wa miradi. Waelimisheni vijana wajiepushe na makundi maovu na washiriki kikamilifu katika kujenga uchumi wa taifa.”Alisema mhe magala

Baraza hilo linaundwa na jumla ya madiwani 23, wakiwemo madiwani wa kuchaguliwa 16, viti maalum 6 pamoja na mbunge wa jimbo. Ambapo Wote wanatokana na Chama Cha Mapinduzi (CCM), jambo linalodhihirisha mshikamano wa kisiasa katika halmashauri Nanyumbu.

Akihitimisha mkutano, Mhe.Benjamin Masimbo  aliwapongeza madiwani wote kwa kuaminiwa na wananchi, akiwataka kutimiza matumaini na imani ya wapiga kura kwa kusimamia ipasavyo shughuli za maendeleo.

 “Pongezi kwa Waheshimiwa Madiwani wote. Tumeteuliwa na kuaminiwa na wananchi; twendeni tukatimize matumaini yao kwa kuwaletea maendeleo. Baraza hili lina jukumu kubwa mbele yake, hasa kuhakikisha linashughulikia kwa dhati shughuli zote za kimaendeleo.”alisema mhe.Masimbo