KAMATI YA PHC NANYUMBU YAJADILI MLIPUKO WA KIPINDUPINDU NA KUWEKA MIKAKATI YA KUKABILIANA NAO.

Posted on: October 28th, 2025

Na; Airin Lipuka

Kamati ya Huduma za Afya ya Msingi (PHC) Wilaya ya Nanyumbu, chini ya uongozi wa Mwenyekiti Mheshimiwa Christopher E. Magala, imekutana leo tarehe 27 Novemba 2025 katika ukumbi wa Shule ya Msingi Mangaka kwa lengo la kupokea na kujadili taarifa ya mlipuko wa ugonjwa wa kipindupindu unaoendelea kuathiri baadhi ya vijiji wilayani nanyumbu..

Katika kikao hicho, Mganga Mkuu wa Hospitali ya Mangaka, Ndugu Marco J. Mazanzagar, aliwasilisha taarifa rasmi ya mlipuko huo kwa kamati. Akieleza hali ya ugonjwa huo, alisema:

“Ugonjwa wa kipindupindu uligundulika tarehe 12 Oktoba 2025 katika kitongoji cha Sauti Moja, kijiji cha Chitowe, na baadaye kusambaa hadi maeneo ya Mangaka na Kilimanihewa. Hadi sasa, jumla ya wagonjwa 20 wamethibitishwa kuambukizwa, huku kifo kimoja kikiripotiwa. Vijiji vilivyoathirika ni Chitowe, Mangaka, Kilimanihewa, Kazamoyo, Masyalele na Mkohora. Chanzo kikuu cha maambukizi ni matumizi ya maji yasiyo safi na salama.”

Katika mjadala uliofuatia, Afisa Mazingira wa Wilaya ya Nanyumbu, Ndugu Elias Matandiko, aliongeza kuwa sababu nyingine inayochangia kuenea kwa ugonjwa huo ni ukosefu wa vyoo katika baadhi ya kaya, hali inayowalazimu wakazi kutumia vichaka kama mbadala wa vyoo. Alisisitiza umuhimu wa ushirikiano kati ya wananchi na maafisa wa afya wanapotoa elimu na kuchukua hatua za kudhibiti maambukizi.

Kamati hiyo iliweka mikakati kadhaa ya kukabiliana na mlipuko huo, ikiwemo:

• Kuendelea kutoa elimu ya afya mashuleni na katika sehemu za ibada
• Kuendelea kuendesha mikutano ya kijamii na kampeni za uhamasishaji kuhusu kipindupindu
• Kutoa matangazo ya mara kwa mara kuhusu tahadhari na hatua za kujikinga

Akihitimisha kikao hicho, Mwenyekiti Mheshimiwa Christopher E. Magala nalitoa wito kwa taasisi husika kuchukua hatua za haraka:

“Nasisitiza umuhimu wa usafi binafsi na usafi wa mazingira. Nawaagiza RUWASA kuboresha upatikanaji wa maji safi na salama, kwani hilo ndilo chanzo kikuu cha mlipuko huu. Elimu kwa wananchi ni silaha muhimu katika kuzuia maambukizi zaidi.”

Kikao hicho kilifungwa rasmi baada ya majadiliano ya kina na kuweka mikakati ya utekelezaji wa haraka.