MHE. SAWALA AWATAKA WAZAZI NA WALEZI KUHAKIKISHA WATOTO WENYE SIFA WARIPOTI SHULENi.

Posted on: January 16th, 2026

Mkuu wa Mkoa wa Mtwara, Mhe. Kanali Patrick Sawala, ametoa wito kwa wazazi na walezi kuhakikisha watoto wote wenye sifa za kujiunga na shule wanaripoti kwa wakati, bila kujali ukosefu wa sare au vifaa vingine vya shule. Amesisitiza kuwa mtoto anaweza kuanza masomo mara moja huku mahitaji mengine yakiendelea kufuatiliwa akiwa shuleni.

Mhe. Sawala ametoa wito huo tarehe 15 Januari 2026 wakati wa ziara yake ya kikazi katika Halmashauri ya Wilaya ya Nanyumbu, iliyolenga kukagua miundombinu ya elimu na hali ya uripoti wa wanafunzi. Akiwa katika Shule ya Msingi Lidede, iliyopo Kijiji cha Lidede, Kata ya Kilimanihewa, Mkuu wa Mkoa aliwahimiza wazazi kushirikiana na walimu na viongozi wa shule katika kuhakikisha watoto wanahudhuria masomo kikamilifu.

Katika ziara hiyo, Mhe. Sawala aliwapongeza wananchi wa Kijiji cha Lidede kwa ushirikiano wao mzuri katika ujenzi wa miundombinu ya shule, na kuwataka waendelee kuunga mkono jitihada za walimu hususan katika suala la lishe shuleni, kwa lengo la kupunguza utoro na kuongeza ufaulu wa wanafunzi.

Aidha, aliwataka viongozi  kuongeza jitihada, ikiwemo kutumia mbinu mbadala pale inapobidi, ili kuhakikisha ujenzi wa mradi wa shule unakamilika kabla ya tarehe 31 Januari 2026.

Ujenzi wa mradi  katika Shule ya Msingi Lidede unahusisha madarasa manne, ofisi moja ya walimu na matundu tisa ya vyoo. Mradi ulianza kutekelezwa rasmi tarehe 12/9/2025 mara baada yakupokea fedha kiasi cha  shilingi 112,401,789.99 kutoka Serikalini kupitia Mpango wa BOOST huku wananchi wakishiriki katika shughuli ndogondogo katika kukamilisha mradi huo.

Wazazi wameshukuru sana Serikali kwa jitihada hizo, wameeleza kuwa Ujenzi wa Shule ya Msingi Lidede Umeondoa Msongamano wa Wanafunzi katika shule mama ya Kilimanihewa na Umbali wa Kutembea kwa wanafunzi.