WATAALAMU WA AFYA NGAZI YA MKOA WAFANYA KIKAO KAZI NANYUMBU KUJADILI VIFO VITOKANAVYO NA UZAZI NA WATOTO WACHANGA.

Posted on: January 16th, 2026

Wataalamu wa afya ngazi ya mkoa wa Mtwara wafanya kikao kazi maalum cha kujadili vifo vitokanavyo na uzazi pamoja na vifo vya watoto wachanga, kwa lengo la kutathmini hali ya sasa, kuchambua takwimu na kuboresha mikakati ya kuzuia vifo vinavyozuilika.

Kikao hicho kinafanyika katika Ukumbi wa Mkapa Girls, Uliopo Wilaya ya  Nanyumbu, na kuongozwa na Kaimu  Mganga Mkuu wa Mkoa wa Mtwara, Dr. Salum Gembe, ambaye amekuwa Mwenyekiti wa kikao.

Akifungua kikao hicho, Dr. Gembe amesema kuwa lengo kuu la kikao ni kuchambua kwa kina takwimu za vifo hivyo  vilivyotokea, kujadili sababu zake na kujifunza namna bora ya kuimarisha utoaji wa huduma za afya ya mama na mtoto ili kuzuia vifo vinavyoweza kuzuilika.

Akiwasilisha taarifa ya vifo vitokanavyo na uzazi na watoto wachanga, Mratibu wa Huduma za Afya ya uzazi na Mtoto Kanda ya Kusini, Bi. Sophia Mchinjita , amesema kuwa mkoa wa Mtwara umeendelea kupunguza vifo vitokanavyo na uzazi. Ameeleza kuwa vifo hivyo vimepungua kwa zaidi ya 50% kutoka vifo 69 mwaka 2024 hadi vifo 38 mwaka 2025. Na kwa Upande wa  Wilaya ya Nanyumbu vifo  vitokanavyo na uzazi vimepungua kwa 71%, kutoka vifo 7 hadi vifo 2.

Aidha, vifo vya watoto wachanga mkoani Mtwara vimepungua kutoka vifo 540 mwaka 2024 hadi vifo 391 mwaka 2025. Amebainisha kuwa kupungua kwa vifo hivyo kunatokana na jitihada za Serikali kuboresha miundombinu ya huduma za afya, kuongeza watumishi wenye ujuzi, kuimarisha upatikanaji wa vifaa tiba na dawa, pamoja na juhudi za mkoa na halmashauri katika kuwajengea uwezo watumishi wa afya na kufanya ufuatiliaji wa karibu wa huduma zinazotolewa.

Kwa upande wake, Kaimu Muuguzi Mkuu wa Mkoa, Ndg, Stanuel Daniel Kosani, ametoa taarifa ya Utekelezaji wa maazimio ya kikao kilichopita amesema kuwa halmashauri zote zimetekeleza maazimio kwa kiwango kikubwa. zote zimevuka lengo la ukusanyaji wa damu, jambo ambalo ni moja ya mahitaji muhimu katika kuzuia vifo vitokanavyo na uzazi.