Waziri Jafo Kukagua Miradi ya Ujenzi Nanyumbu

Posted on: December 19th, 2019

Waziri wa Nchi, Ofisi ya Rais, Tawala za Mikoa na Serikali za Mitaa Mhe. Selemani S. Jafo (Mb) akisaini kitabu cha wageni katika Ofisi ya Mkuu wa Wilaya Nanyumbu

Na, Lunanilo L. Ngela

Waziri wa Nchi Ofisi ya Rais TAMISEMI  amefanya ziara mapema leo Disemba 19, 2019 katika Wilaya ya Nanyumbu na kukagua Miradi mbalimbali ya ujenzi wa miundombinu katika Hospitali ya Wilaya.

Katika ziara hiyo, Mhe. Selemani Jafo ameagiza kasi iongezwe katika ujenzi wa wodi ya wazazi (Maternity) ili kurahisisha upatikanaji wa huduma bora kwa wazazi. Akikagua jengo la Mionzi, Waziri Jafo amepongeza ujenzi wa jengo hilo. Aidha,  amemtaka Mhandisi kuhakikisha dosali ndogo ndogo za jengo hilo zinashughulikiwa kwa haraka.

Waziri Jafo akizungumza na Wakuu wa Idara na Vitengo wa Halmashauri ya Wilaya ya Nanyumbu, amewataka watendaji hao kuhakikisha wanafanya kazi kwa bidii ili kufanikisha malengo ya Serikali ya Awamu ya tano  inayoongozwa na Mhe. Dr, John Pombe Magufuli ya kuhakikisha wananchi wote wanapata huduma bora na kwa wakati.

Kutokana na malalamiko yaliyofika Ofisini kwake juu ya Ujenzi wa miundombinu unaoendelea hospitalini hapo, Waziri Jafo ameunda Tume maalumu itakayochunguza mchakato mzima wa manunuzi pamoja na ujenzi huo. Aidha, Tume hiyo iliyoundwa na Mhe. Waziri pia itachunguza mahusiano yaliyopo baina ya watumishi wa Wilaya hiyo.

Mbunge wa Jimbo la Nanyumbu Mhe. Dua W. Nkurua akizungumza katika Ziara hiyo ameiomba Ofisi ya Rais TAMISEMI kuendelea kuleta fedha za Miradi ya Maendeleo ili kuboresha huduma za jamii ikiwemo Afya.

Kukamilika kwa Jengo la Mionzi kutaondoa kero kubwa wanayoipata wananchi kwa sasa ya kusafiri mpaka Wilaya ya Masasi kupata huduma za X-Ray.