DAS Kanyinda Awapongeza Waganga Wafawidhi Nanyumbu

Posted on: August 26th, 2025

Katibu Tawala wa Wilaya ya Nanyumbu, Ndg. Juma Saidi Kanyinda, amewapongeza watumishi wa Idara ya Afya kwa kuimarisha na kuongeza upatikanaji wa huduma za afya katika Hospitali ya Wilaya, vituo vya afya na zahanati.

Akizungumza katika kikao kazi cha tathmini ya utendaji kazi kwa waganga wafawidhi kwa mwaka 2023/2024 kilichofanyika katika ukumbi wa Shule ya Msingi Mangaka, Ndg. Kanyinda alisema utendaji kazi wa watumishi hao umeendelea kuimarika na kuwataka waongeze bidii ili kuhakikisha wananchi wanapata huduma bora.

Awali, Mganga Mkuu wa Wilaya ya Nanyumbu, Ndg. Marco Mazanzaga, alisema sekta ya afya imeendelea kukua ikilinganishwa na miaka mitatu iliyopita. Kwa sasa kumekuwepo na ongezeko la zahanati 10, vituo vya afya 2 pamoja na ujenzi wa majengo mapya ya huduma za dharura (EMD), wagonjwa wa nje (OPD), bohari ya dawa na maabara katika Hospitali ya Wilaya.

Aidha, hali ya upatikanaji wa dawa na vifaa tiba muhimu imeimarika kutoka asilimia 88 mwaka 2022 hadi asilimia 95 mwaka 2024, huku bajeti ya manunuzi ya dawa na vifaa tiba ikiongezeka kutoka shilingi milioni 647.3 mwaka 2022/2023 hadi shilingi bilioni 1.7 mwaka 2024/2025.

Vilevile, idadi ya vituo vinavyotoa huduma za kujifungulia akinamama wajawazito imeongezeka kutoka vituo 21 mwaka 2022 hadi 30 mwaka 2024, huku upatikanaji wa vidonge vya kuongeza damu kwa wajawazito ukiongezeka kutoka asilimia 74.1 mwaka 2022 hadi asilimia 85.8 mwaka 2024.

Serikali imeendelea kuimarisha huduma za afya wilayani Nanyumbu kupitia ujenzi wa miundombinu ya vituo vya afya, ununuzi wa dawa na vifaa tiba pamoja na uimarishaji wa mifumo ya TEHAMA, ikiwemo mfumo wa usimamizi na uendeshaji wa huduma za afya (GoT–HOMIS).