Juma la Elimu Lafana Nanyumbu: Walimu na Wanafunzi Bora Wazawadiwa Milioni 30

Posted on: August 9th, 2025

Na; Lunanilo Ngela

Zaidi ya shilingi milioni 30.1 zimetolewa kama zawadi kwa wanafunzi waliofanya vizuri katika mitihani ya Taifa, walimu waliowawezesha wanafunzi kupata alama za juu (“A” na “B”), pamoja na shule zilizong’ara kitaaluma mwaka 2024.

Zawadi hizo, pamoja na vyeti vya pongezi, zilitolewa na Mkuu wa Wilaya ya Nanyumbu, Mheshimiwa Christopher Edward Magala, wakati wa maadhimisho ya Juma la Elimu ngazi ya wilaya yaliyofanyika Agosti 10, 2025, katika ukumbi wa Shule ya Wasichana Mkapa.

Katika maadhimisho hayo, mgeni rasmi Mheshimiwa Magala alipata fursa ya kutembelea maonesho mbalimbali ya kisayansi yaliyoandaliwa na wanafunzi na walimu, na akapongeza ubunifu huo kuwa na mchango mkubwa katika kuinua elimu ya sayansi na teknolojia.

Akisoma risala ya elimu, Kaimu Afisa Elimu Sekondari wa Wilaya, Ndg. Seif Zuber, alieleza mafanikio makubwa ya kitaaluma, ikiwemo ufaulu wa asilimia 100 kwa Kidato cha Sita 2024, asilimia 90 kwa Kidato cha Nne, na asilimia 82 kwa Kidato cha Pili.

Hata hivyo, alibainisha kuwa tatizo la utoro wa kudumu na rejareja katika shule za msingi na sekondari linaendelea kuathiri sekta ya elimu. Mkuu wa Wilaya alisisitiza kuwa jitihada zaidi zinahitajika kukabiliana na changamoto hiyo.

Juma la Elimu huadhimishwa kila mwaka katika ngazi ya kata, wilaya, mkoa na taifa, ambapo wadau hutathmini mwenendo wa elimu na kupanga mikakati ya kukabiliana na changamoto.

Kauli mbiu ya maadhimisho ya mwaka 2025 ni: “Sayansi na Teknolojia kwa Maendeleo ya Taaluma na Mazingira, Jitokeze Kushiriki Uchaguzi Mkuu 2025.”