Kuelekea Uchaguzi Mkuu 2025: Njaro Awataka Wasimamizi wa Uchaguzi Kuzingatia Katiba, Sheria na Miongozo ya INEC

Posted on: August 4th, 2025

Na, Lunanilo Ngela

Msimamizi wa Uchaguzi Jimbo la Nanyumbu, Ndg. Juma Rajabu Njaro, amewataka Wasimamizi Wasaidizi wa Uchaguzi ngazi ya kata kuhakikisha wanasoma kwa makini Katiba, sheria, kanuni, miongozo na maelekezo yanayotolewa na Tume Huru ya Taifa ya Uchaguzi ili kutekeleza kwa ufanisi majukumu yao katika Uchaguzi Mkuu wa Rais, Wabunge na Madiwani utakaofanyika Oktoba 29, 2025.

Maelekezo hayo ameyatoa Agosti 04, 2025 wakati akifungua mafunzo ya siku tatu kwa wasimamizi wasaidizi wa uchaguzi ngazi ya kata, yaliyofanyika katika ukumbi wa Halmashauri ya Wilaya ya Nanyumbu. Mafunzo hayo yamehudhuriwa na washiriki 34 kutoka kata zote 17 za Wilaya hiyo.

Awali kabla ya kuanza kwa mafunzo hayo, washiriki walikula kiapo cha kutunza siri na tamko la kujitoa uanachama wa chama cha siasa mbele ya Hakimu wa Wilaya ya Nanyumbu, Mhe. Asifiwe Jembe, ili kuhakikisha wanatekeleza majukumu yao kwa uadilifu na kwa kuzingatia maadili ya kazi.

Tanzania hufanya Uchaguzi Mkuu wa Rais, Wabunge na Madiwani kila baada ya miaka mitano. Uchaguzi uliopita ulifanyika mwaka 2020, na uchaguzi ujao umepangwa kufanyika mwezi Oktoba 2025.

"Kura Yako, Haki Yako – Jitokeze Kupiga Kura."