Wasimamizi Wasaidizi wa Uchaguzi Nanyumbu Wajengewa Uwezo Kusimamia Uchaguz Novemba 27, 2024

Posted on: September 30th, 2024

Msimamizi wa Uchaguzi Wilaya ya Nanyumbu Ndg. Juma Njaro (wa tatu kushoto) akizungumza na washiriki wa mafunzo

Na, Lunanilo Ngela

Wasimamizi wasaidizi wa uchaguzi ngazi ya kata na vijiji katika Wilaya ya Nanyumbu wamepatiwa mafunzo maalum yanayolenga kuwajenga uwezo wa kutekeleza na kusimamia shughuli za uchaguzi wa serikali za mitaa unaotarajiwa kufanyika Novemba 27 2024.

Akifungua mafunzo hayo yaliyofanyika Septemba 30, 2024, Msimamizi wa Uchaguzi wa Halmashauri ya Wilaya hiyo, Ndugu Juma Rajabu Njaro, amesema kuwa nafasi waliyopewa wasimamizi hao ni nyeti na inahitaji umakini mkubwa ili kuhakikisha uchaguzi unafanyika kwa uwazi na ufanisi. Aidha, aliwasihi kuzingatia maadili, uwajibikaji, na weledi katika maandalizi na utekelezaji wa mchakato mzima wa uchaguzi.

Njaro alieleza kuwa uchaguzi wa serikali za mitaa ni tukio muhimu la kikatiba, kama ilivyotangazwa na Waziri wa TAMISEMI, Mheshimiwa Mohamed Omary Mchengerwa, tarehe 15 Agosti 2024. Wilaya ya Nanyumbu imetenga jumla ya vituo 526 vya kuandikisha na kupigia kura, ambapo kila kitongoji kitakuwa na kituo chake cha kupigia kura.

Katika mafunzo hayo, washiriki walipewa elimu kuhusu kanuni, taratibu, na miongozo ya uchaguzi, pamoja na jinsi ya kujaza fomu mbalimbali zitakazotumika katika mchakato wa uchaguzi. Njaro alisisitiza umuhimu wa kufuatilia mafunzo hayo kwa makini ili kuepuka makosa yanayoweza kuhatarisha utaratibu mzima wa uchaguzi.

Zoezi la uandikishaji wapiga kura litafanyika kuanzia tarehe 11 hadi 20 Oktoba 2024 katika vituo vilivyopangwa. Aidha, fomu za kugombea nafasi za uongozi wa vijiji, wajumbe wa halmashauri za vijiji, na wenyeviti wa vitongoji zitatolewa kuanzia tarehe 1 hadi 7 Novemba 2024.