Serikali kushughulikia soko la Korosho

Posted on: October 29th, 2018

Mkuu wa Wilaya ya Nanyumbu Mhe. Moses Machali (wa kwanza kulia) akiwa katika Mkutano na wananchi wa Mji wa Mangaka uliofanyika Jana Tarehe 28/10/2018 Mangaka Mjini

Na, Lunanilo L. Ngela

Mkuu wa Wilaya ya Nanyumbu amekutana na wananchi wa Mji wa Mangaka na kuzungumza nao mambo mbalimbali kuhusu soko la korosho katika Msimu huu wa kilimo wa 2018/2019. Akizungumza katika mkutano huo amesema kuwa Mheshimiwa Rais wa Jamhuri ya Muungano wa Tanzania Dr, John Pombe Magufuli anawaunga mkono wakulima kwa kukataa bei ndogo ya korosho. Aidha, amesema kuwa nia na lengo la Serikali ni kuhakikisha mkulima anapata soko zuri la uhakika. Wananchi wameshauriwa kuwa wavumilivu katika kipindi hiki kifupi wakati Serikali inashughulikia soko la Korosho.

Mheshimiwa Machali pamoja na kuzungumzia soko la Korosho pia ameviagiza vyama vyote vya Msingi vya ushirika vinavyodaiwa fedha za wakulima katika msimu uliopita wa 2017/2018 kuhakikisha vinalipa fedha hizo kabla ya Mwezi Disemba mwaka huu.

Akizungumzia suala la usafi wa mazingira, Mheshimiwa Mkuu wa Wilaya amewapongeza wananchi kwa kufanikiwa kuufanya Mji wa Mangaka kuwa safi. Aidha, amekemea tabia ya baadhi ya watu wenye mifugo mfano mbuzi na ng'ombe kuiacha mifugo hiyo ikizurura mtaani na kuchafua mazingira pamoja na kuhatarisha usalama wa watumiaji wa barabara. Mkuu wa Wilaya ameagiza watu wote wanaoiacha mifugo ikizurura mjini wachukuliwe hatua.

Wananchi wamesisitizwa kulima Ufuta na alizeti na kutotegemea Korosho peke yake kama zao la biashara. Aidha, Mkuu wa Wilaya amesema kuwa Idara ya Kilimo Nanyumbu inafanyia utafiti zao la mhogo. Mkuu wa Wilaya pia amewashauri wafanya biashara wa Wilaya ya Nanyumbu kuwekeza katika viwanda vidogo vidogo mfano vya kukamua mafuta ya alizeti ili kuongeza kipato.

Akizungumzia suala la maji, Mheshimiwa Machali amesema kuwa Wilaya inaendelea kuchimba visima ikiwa ni pamoja na kuandaa mpango wa kusanifu mabwawa sita (6) yatakayosambaza maji kwa wananchi. Aidha, kufanikiwa kwa mradi huo mkubwa wa mabwawa kutategemea upatikanaji wa fedha.

Wananchi wa Wilaya ya Nanyumbu waliozungumza na Ofisi ya Habari wamemshukuru sana Rais wa Jamhuri ya Muungano wa Tanzania Mheshimiwa Dr, John Pombe Magufuli kwa kusima kidete katika kutetea wakulima na wananchi wanyonge. Aidha, wametoa pongezi za dhati kwa Mkuu wa Mkoa wa Mtwara Mhe. Gelasius Gaspar Byakanwa pamoja na Mkuu wa Wilaya ya Nanyumbu kwa kujitoa mhanga kutetea  wakulima na wananchi kwa ujumla.