Rais Samia atoa Bilioni 3.6 mradi wa maji Sengenya wilayani Nanyumbu

Posted on: May 26th, 2023

Katika Picha ni Mkuu wa Wilaya ya Nanyumbu Mhe. Mariam Chaurembo (mwenye miwani) akiwa eneo la mradi

Na, Lunanilo Ngela

Mkuu wa Wilaya ya Nanyumbu Mhe. Mariam Khatibu Chaurembo amemkabidhi mkandarasi RJ MUSSA CONSTRUCTION CO. LTD JV GOPA CONTRACTOR mradi wa kukarabati na kupanua bwawa la maji Sengenya utakaogharimu shilingi 3,652,207,125.00 ili kuliongezea uwezo bwawa hilo wa kuhifadhi maji toka lita milioni 90 hadi kufikia lita milioni 514 kwa mwaka.

Akizungumza katika hafla ya kukabidhi eneo la mradi iliyofanyika Kijiji cha Mara Kata ya Sengenya Mei 26, 2023 Mhe. Chaurembo amesema kuwa, mradi huo utatekelezwa kwa miezi tisa na tayari mkandarasi ameshafika eneo la mradi kwa ajili ya kuanza utekelezaji.

Mkuu wa Wilaya amewataka wananchi kuheshimu mipaka ya eneo la mradi, kuhifadhi miundombinu ya mradi pamoja na vyanzo vya maji. Aidha, amemwagiza mkandarasi kuhakikisha anatoa ajira kwa wazawa pindi zinapohitajika.

Naye Kaimu Meneja wa RUWASA Wilaya ya Nanyumbu Mhandisi Simon S. Mchucha amemweleza Mkuu wa Wilaya kuwa, mradi wa maji wa bwawa la Sengenya ni tegemeo kubwa kwa wakazi wa Kata ya Sengenya pamoja na Mji wa Mangaka yalipo makao makuu ya Wilaya ya Nanyumbu, hivyo upanuzi wa mradi huo utawezeshe maeneo hayo kupata uhakika wa huduma ya maji kwa kipindi chote cha mwaka.

“Naomba Rais Samia apigiwe simu kumshukuru kwa kutupatia fedha hizi” Ni maneno aliyoyasema Diwani wa Kata ya Sengenya Mhe. Msafiri Ibrahimu Kasembe (Kapelepete) wakati akitoa shukrani zake za dhati kwa Rais wa Jamhuri ya Muungano wa Tanzania Mhe. Dkt. Samia Suluhu Hassan kwa kuipatia Kata hiyo mradi huo mkubwa unaolenga kumtua mwanamke ndoo, ikiwa ni utekelezaji wa Ilani ya uchaguzi ya Chama Cha Mapinduzi 2020/2025.