Nanyumbu yasaini mkataba wa Shilingi bilioni 2.1 kwa ajili ya Ujenzi wa stendi ya mabasi Mangaka

Posted on: May 5th, 2018

Halmashauri ya Wilaya ya Nanyumbu imesaini Mkataba wa Ujenzi wa stendi mpya ya kisasa ya mabasi wenye thamani ya Shilingi Bilioni 2.1 mbele ya Mh. Selemani Jaffo (Waziri TAMISEMI) mapema leo mjini Dodoma. Stendi hii ya kisasa ya mabasi itajengwa mjini Mangaka katika Wilaya ya Nanyumbu. Aidha, katika zoezi la kusaini mkataba huo, Wilaya ya Nanyumbu iliwakilishwa na Mwenyekiti wa Halmashauri Mh. Ahamad B. Mchopa, Mkurugenzi wa Halmashauri ya Wilaya ya Nanyumbu Ndg. Hamisi H. Damabaya pamoja na baadhi ya Wakuu wa Idara.

Ofisi ya Habari imezungumza na Katibu Tawala wa Wilaya ya Nanyumbu Ndg. Salumu A. Palango ambaye ameishukuru sana Serikali ya Jamhuri ya Muungano wa Tanzania chini ya Uongozi makini wa Mh. Dr John Pombe Magufuli kwa kuipatia Fedha hizi Wilaya ya Nanyumbu. Aidha, amewapongeza sana watendaji wote wa Halmashauri ya Wilaya ya Nanyumbu wakiongozwa na Mkurugenzi wa Halmashauri ya Wilaya ya Nanyumbu Ndg. Hamisi H. Dambaya kwa umakini wao na bidii kubwa wanayoionyesha iliyopelekea kufaulu vigezo vilivyowekwa na Wizara ya Fedha kwa nchi nzima ili kupewa fedha hizi.

Wananchi wa Wilaya ya Nanyumbu wakiongea kwa nyakati tofauti wameishukuru sana Serikali ya Jamhuri ya Muungano wa Tanzania ikiongozwa na Rais wa awamu ya tano Mh. Dr John Pombe Magufuli kwa kuendelea kuipenda na kuithamini Wilaya ya Nanyumbu. Aidha, Shukrani zao pia za dhati ni kwa Mbunge wa Jimbo la Nanyumbu Mh. Dua W. Nkurua pamoja na watendaji wote wa Wilaya ya Nanyumbu kwa kasi kubwa waliyonayo katika kuiletea Maendeleo Wilaya ya Nanyumbu. Stendi hii mpya na ya kisasa mjini Mangaka itakuwa ni chanzo bora cha mapato kwa Wilaya ya Nanyumbu.

Mungu ibariki Tanzania, Mungu ibariki Nanyumbu.