HALMASHAURI YA WILAYA YA NANYUMBU YAZINDUA RASMI ZOEZI LA UPANDAJI MITI.

Posted on: February 9th, 2026

Na, Kitengo cha Mawasiliano Serikalini.

Halmashauri ya Wilaya ya Nanyumbu imezindua rasmi zoezi la upandaji miti katika Shule ya Sekondari Mkonona iliyopo Kata ya Mkonona, ikiwa ni sehemu ya juhudi za kulinda mazingira na kukabiliana na athari za mabadiliko ya tabianchi.

Uzinduzi huo umefanyika chini ya uongozi wa Mkuu wa Wilaya ya Nanyumbu, Mhe. Christopher Edward Magala, ambaye aliwahimiza wananchi, taasisi na wadau mbalimbali kushiriki kikamilifu katika zoezi la upandaji na utunzaji wa miti. Mhe. Magala alisisitiza kuwa kila mwananchi anapaswa kupanda angalau miti mitano (5) kama mchango wake binafsi katika uhifadhi wa mazingira kwa manufaa ya vizazi vya sasa na vijavyo.

Akizungumza katika hafla hiyo, Mkuu wa Idara ya Maliasili ya Wilaya ya Nanyumbu, Bw. William Bujiku, aliwasilisha taarifa ya utekelezaji wa zoezi la upandaji miti kwa mwaka wa fedha 2024/2025, ambapo jumla ya miche 140,000 ilifanikiwa kupandwa katika maeneo mbalimbali ya wilaya hiyo.

Bw. Bujiku alieleza kuwa katika mwaka wa fedha 2025/2026, Halmashauri imejipanga kupanda jumla ya miche 260,000 kwa kushirikiana na jamii, taasisi za umma na binafsi, pamoja na wadau wa maendeleo, ikiwa ni mwendelezo wa jitihada za kuhifadhi mazingira na rasilimali za asili.

Aidha, alibainisha kuwa hadi sasa jumla ya miche 16,000 tayari imeshatolewa kwa wananchi, shule za msingi na sekondari, TARURA, hospitali pamoja na taasisi za dini, lengo likiwa ni kuhamasisha ushiriki wa jamii katika kulinda mazingira.

Hata hivyo, Bw. Bujiku alitaja changamoto zinazoikabili Wilaya ya Nanyumbu katika uhifadhi wa mazingira, zikiwemo ukataji ovyo wa miti, uchomaji moto wa misitu, mabadiliko ya tabianchi pamoja na uharibifu wa vyanzo vya maji.

Kwa upande wake, Mhe. Magala alisisitiza umuhimu wa kuchukua hatua za haraka na makusudi kukabiliana na changamoto hizo, akitoa wito kwa wananchi wote kushiriki kikamilifu katika upandaji na utunzaji wa miti ili kuhakikisha mazingira yanahifadhiwa kwa ustawi wa jamii na maendeleo endelevu.

Uzinduzi wa zoezi hili la upandaji miti ni sehemu ya jitihada endelevu za Halmashauri ya Wilaya ya Nanyumbu katika kulinda mazingira, kupunguza athari za mabadiliko ya tabianchi, na kuendeleza utamaduni wa uhifadhi wa rasilimali za asili kwa manufaa ya wote.