NANYUMBU DC YAFANYA MKUTANO WA ROBO YA PILI WA BARAZA LA MADIWANI.

Posted on: February 10th, 2026

Na: Kitengo cha Habari na Mawasiliano Serikalini (H/W) – Nanyumbu

Baraza la Madiwani la Halmashauri ya Wilaya ya Nanyumbu mkoani Mtwara, Februari 10, 2026, limekutana kujadili na kupitia taarifa za utekelezaji wa shughuli za maendeleo kwa robo ya pili ya mwaka wa fedha 2025/2026. Mkutano huo umefanyika ikiwa ni sehemu ya wajibu wa kisheria wa Baraza la Madiwani kusimamia matumizi ya rasilimali za umma na kuhakikisha utekelezaji mzuri wa miradi ya maendeleo katika Halmashauri.

Katika mkutano huo, taarifa za Kamati za Kudumu za Halmashauri pamoja na zile za taasisi za umma zikiwemo TAWA, RUWASA na TARURA  n.k ziliwasilishwa na kujadiliwa kwa kina. Madiwani walitoa maoni, ushauri, waliuliza maswali na kutoa mapendekezo mbalimbali kwa lengo la kuimarisha usimamizi na utekelezaji wa miradi ya maendeleo kwa manufaa ya wananchi.

Akiongoza mkutano huo, Mwenyekiti wa Halmashauri ya Wilaya ya Nanyumbu, Mheshimiwa Benjamini Masimbo, amewataka watendaji kuhakikisha miradi ya maendeleo inatekelezwa kwa wakati ili kuboresha huduma kwa wananchi. Aidha, amezitaka taasisi za umma kutekeleza majukumu yao kwa weledi na kwa kuzingatia sheria na taratibu

Kwa upande wake, Mkuu wa Wilaya ya Nanyumbu, Mheshimiwa Magala, amesisitiza umuhimu wa wananchi kujiorodhesha kwenye daftari kwa lengo la kuimarisha swala la ulizi na usalama, kukamilisha miradi ya maendeleo kwa wakati, pamoja na kuimarisha ufuatiliaji wa mahudhurio ya wanafunzi shuleni.

Naye Mwenyekiti wa Chama cha Mapinduzi (CCM) Wilaya ya Nanyumbu  Rashidi A, Mrope ametoa wito kwa watendaji wote wa Halmashauri, Taasisi za Umma kufanya kazi kwa bidii na kwa kuzingatia Ilani ya Chama cha Mapinduzi kama mwongozo wa utekelezaji wa shughuli za maendeleo.