Nanyumbu Yanoa Watumishi Wapya Kupitia Mafunzo Maalum

Posted on: September 3rd, 2025

Mkuu wa Idara ya Utawala na Raslimali Watu wa Halmashauri ya Nanyumbu Ndg. Joshua Mgoli akizungumza na watumishi wapya

Na, Lunanilo Ngela

Halmashauri ya Wilaya ya Nanyumbu imeendesha mafunzo maalum kwa watumishi wapya walioajiriwa katika mwaka wa fedha 2023/2024 na 2025/2026, kwa lengo la kuwajengea uwezo katika kutekeleza majukumu yao ya kila siku ya kiutumishi.

Mafunzo hayo ya siku moja yalifanyika Septemba 3, 2025 katika ukumbi wa Shule ya Sekondari ya Wasichana Mkapa, yakifunguliwa rasmi na Afisa Utumishi wa Halmashauri, Ndg. Joshua Samweli Mgoli, kwa niaba ya Mkurugenzi Mtendaji wa Halmashauri.

Akizungumza katika mafunzo hayo, Katibu Tawala wa Wilaya, Ndg. Juma Saidi Kanyinda, aliwasisitiza watumishi hao kutoa huduma bora kwa wananchi. Naye Mkuu wa TAKUKURU Wilaya, Kamanda Paschal Lufungulo, aliwakumbusha watumishi hao kuepuka vitendo vya rushwa ili kulinda maadili ya utumishi wa umma.

Miongoni mwa taasisi zilizoshiriki kutoa mada ni Mfuko wa Hifadhi ya Jamii (PSSF), Mfuko wa Fidia kwa Wafanyakazi (WCF), benki ya CRDB, Benki ya MNB, pamoja na Jeshi la Zimamoto na Uokozi.

Aidha, wakuu wa idara na vitengo mbalimbali vya Halmashauri walishiriki kikamilifu katika mafunzo hayo, ikiwa ni sehemu ya kuimarisha ushirikiano na kuongeza ufanisi wa watumishi wapya katika utekelezaji wa majukumu ya kila siku.