Nanyumbu yamfurahisha Naibu Waziri wa Ardhi

Posted on: January 9th, 2020

Naibu Waziri wa Ardhi, Nyumba na Maendeleo ya Makazi Mhe. Angelina Mabula (Mwenye miwani) akiwa katika ziara ya kikazi wilayani Nanyumbu

Na, Lunanilo L. Ngela

Naibu Waziri wa Ardhi, Nyumba na Maendeleo ya Makazi Mhe. Angelina Mabula (Mb), amefanya ziara ya kikazi mapema leo katika Wilaya ya Nanyumbu ili kukagua utekelezaji wa majukumu yanayofanywa katika Sekta ya Ardhi wilayani humo.

Akizungumza na Uongozi wa Wilaya ya Nanyumbu Mhe. Mabula, ameipongeza Idara ya Ardhi Nanyumbu kwa kutekeleza maagizo mbalimbali yanayotolewa na Wizara hiyo ikiwemo uingizaji wa taarifa katika mfumo wa kielektoniki wa utunzaji wa kumbukumbu na makadirio ya kodi (LRMS).

Pamoja na pongezi hizo, Mhe. Mabula ameagiza kasi iongezwe katika kumilikisha Adhi na kutoa Hati, kuharakisha Mpango bora wa matumizi ya ardhi kwa vijiji visivyokuwa na mpango huo ikiwa ni pamoja na kuhakikisha Taasisi zote zinakuwa na Hati Miliki.

Mkuu wa Wilaya ya Nanyumbu Mhe. Moses J. Machali akizungumzia suala la migogoro ya ardhi, amesema kuwa upo mgogoro katika vijiji vya Mbangala Mbuyuni na Marumba ambako wananchi wanaishi katika vijiji ambavyo vimo ndani ya hifadhi. Aidha, amesema tathmini imefanyika na yanangojwa maelekezo ya Wizara ili kujua kama wananchi hao wataruhusiwa kuishi katika vijiji hivyo au kuondolewa.

Mbunge wa Jimbo la Nanyumbu Mhe. Dua W. Nkurua, ameiomba Waziri ya Ardhi, Nyumba na Maendeleo ya Makazi kuipatia Wilaya ya Nanyumbu Baraza la Ardhi la Wilaya ili kuondoa kero kubwa wanayoipata wananchi wa Wilaya hiyo ya kusafiri umbali mrefu mpaka Mtwara Mjini ili kupata huduma hizo.

Naibu Waziri wa Ardhi amekubali ombi la Mbunge wa Jimbo la Nanyumbu na kuiagiza Wilaya kutafuta jengo ili kupewa Baraza la Ardhi la Wilaya.