Nanyumbu yafanya mapinduzi makubwa sekta ya kielimu

Posted on: July 5th, 2018

Mwanafunzi wa Shule ya Msingi ya Mangaka akionesha namna ya kutumia kompyuta katika matumizi mbalimbali mbele ya wazazi na wageni waalikwa waliohudhuria kilele cha Juma la Elimu kiwilaya

Juma la Elimu wilayani Nanyumbu limekamila katika viwanja vya Shule ya Msingi Kilimanihewa huku wadau mbalimbali wa Elimu wakipongeza hatua mbalimbali ambazo Wilaya ya Nanyumbu imefanya ili kuboresha Elimu.  Wilaya ya Nanyumbu ina shule za msingi tisini na nne (94) na shule za sekondari kumi na mbili (12). Aidha, kuna jumla ya wanafunzi 39,608 wa shule za Msingi na wanafunzi 3,572 wa shule za sekondari. Wilaya ina jumla ya walimu 608 wa Shule za Msingi na walimu  226 wa Shule za Sekondari.

Wilaya ya Nanyumbu ikishirikiana na wananchi imefanya ujenzi wa miundombinu mbalimbali ya shule ili kuhakikisha kiwango cha Elimu kinaongezeka. Mwaka 2017/2018 Nanyumbu imefanya ujenzi wa madarasa 146, nyumba za walimu 46, matundu ya vyoo 192, Ofisi za walimu 15. Aidha, ukarabati wa maabara za sayansi na ujenzi wa hosteli unaendelea kwa shule mbalimbali za Sekondari. Ujenzi wa miundombinu hiyo umekamilika kwa baadhi ya shule.

Kaimu Afisa Elimu Msingi wa Wilaya ya Nanyumbu Ndugu, Seifu Chilumba akisoma risala kwa Mgeni rasmi amesema kuwa, Wilaya ya Nanyumbu pamoja na kwenda kwa kasi katika ujenzi wa miundombinu ili kumaliza kabisa tatizo la ukosefu wa miundombinu ya shule pia Wilaya imepata mafanikio katika maeneo mengine ya elimu ikiwa ni pamoja na kuwaandikisha wanafunzi wengi zaidi wa madarasa ya awali na darasa la kwanza ikilinganishwa na miaka iliyopita, kupunguza utoro na hasa kwa shule za Sekondari, kuongeza ufaulu kwa shule za msingi na Sekondari ikilinganishwa na miaka iliyopita. Mwaka 2017 Hali ya ufaulu kwa shule za msingi imeongezeka na kufikia asilimia 51.48 ikilinganishwa na mwaka 2016 ambapo ufaulu ilikuwa ni asilimia 32 tu. Aidha, Ufaulu umeongezeka kwa Shule za sekondari katika mwaka 2017 na kufikia asilimia 77 ikilinganishwa na mwaka 2016 ambapo ufaulu ilikuwa asilimia 56.5.

Wazazi na wadau wa Elimu wametowa pongezi za dhati kwa Mkuu wa Wilaya ya Nanyumbu Mh.Selemani Mzee, Mkurugenzi Mtendaji wa Halmashauri ya wilaya ya Nanyumbu Ndugu Hamis H. Dambaya, Mbunge wa Jimbo la Nanyumbu Mh. Dua W. Nkurua, Katibu Tawala wa Wilaya ya Nanyumbu Ndugu Salum A. Palango pamoja na watendaji wengine katika ngazi mbalimbali kwa kuhakikisha wanainua kiwango cha Elimu katika Wilaya ya Nanyumbu. Wananchi wamesema pia katika kipindi cha mwaka 2016/2017 na 2017/2018 wameiona kasi kubwa ya ujenzi wa miundombinu mbalimbali ikilinganishwa na miaka iliyopita. Aidha, wananchi wamempongeza sana Rais wa Jamhuri ya Muungano wa Tanzania Mh. John Pombe Magufuli kwa kuwasimamia vizuri watendaji wote wa Serikali ili kusukuma mbele gurudumu la maendeleo. Aidha, Wananchi wamekiri kuwa sasa wanaiona Tanzania mpya ya wachapakazi.

Juma la elimu kwa mwaka 2018 limeongozwa na Kauli mbiu isemayo ELIMU NI UFUNGUO WA MAISHA, WEKEZA SASA.