Nanyumbu wahamasishwa kutoa maoni Dira ya Taifa ya Maendeelo 2050

Posted on: July 23rd, 2024

Na, Lunanilo Ngela

Mwakilishi wa Mkuu wa Wilaya ya Nanyumbu ambaye pia ni Afisa Tarafa ya Mangaka, Ndg. Baraka Mlahagwa, ameongoza kikao cha Kamati ya Maendeleo ya Wilaya kilichofanyika Julai 23, 2024, kwa lengo la kukusanya maoni kuhusu utekelezaji wa Dira ya Taifa ya Maendeleo 2025 na matarajio ya Dira mpya ya Maendeleo 2050.

Kikao hicho, kilichofanyika katika ukumbi wa Halmashauri, kilihudhuriwa na wajumbe pamoja na wawakilishi kutoka makundi mbalimbali ya wadau, ikiwemo sekta binafsi, asasi za kiraia, taasisi za dini, na makundi maalum kama vijana, wanawake, wazee, wakulima, wavuvi, wasafirishaji, watu wenye mahitaji maalum, vyama vya michezo na sanaa, viongozi wa dini, viongozi wa kimila, wafugaji, wafanyabiashara ndogondogo, vyama vya ushirika, na vyama vya wafanyakazi.

Mwenyekiti wa kikao hicho aliwaeleza wajumbe kuwa Dira ya Maendeleo ya Taifa ilizinduliwa mwaka 1999 na Serikali ya Tanzania, ikilenga kuwa na uchumi wa kipato cha kati ifikapo mwaka 2025, kuboresha miundombinu na huduma za kijamii kama vile elimu, afya, na upatikanaji wa maji safi, kuongeza usawa wa kijinsia na uwezeshaji wa wanawake, kuimarisha utawala bora, utawala wa sheria, na haki za binadamu pamoja na kujenga uchumi unaoongozwa na viwanda ili kuongeza ajira na kipato cha wananchi.

Washiriki wa kikao hicho walielezea mafanikio mbalimbali ya utekelezaji wa Dira ya 2025, ikiwemo Tanzania kuingia katika kundi la nchi za kipato cha kati, kuimarika kwa huduma za elimu, afya, miundombinu ya usafiri, mawasiliano, umeme, maji safi, na usawa wa kijinsia hususani kwenye elimu na nafasi za uongozi.

Wananchi hao walisema kuwa Dira ya Maendeleo 2050 ilenge kumaliza tatizo la ajira kwa vijana, kuimarisha sekta za viwanda na madini ili kuondoa utegemezi kwa mataifa yaliyoendelea, na kuwawezesha wakulima wadogo kutumia zana bora za kilimo badala ya jembe la mkono na kutegemea mvua.

Mkurugenzi Mtendaji wa Halmashauri, Ndg. Ibrahim Mwanauta, alisisitiza kuwa lengo la serikali ni kuhakikisha wananchi hawaachwi nyuma katika mchakato wa maandalizi ya Dira ya Taifa ya Maendeleo 2050, na hivyo kuwasihi watu wote kutoa maoni yao kwa njia ya simu kwa kuingia *152*00# au kwa kujaza dodoso lililopo mtandaoni kupitia https://dira2050portal.planning.go.tz/tume/dira