Nanyumbu kuadhimisha Siku ya Elimu kiwilaya

Posted on: January 5th, 2019

Mkuu wa Wilaya ya Nanyumbu Mhe. Moses J. Machali akizungumza na washiriki wa Siku ya Elimu wilayani Nanyumbu iliyofanyika Tarehe 05/Jan/2019

Na, Lunanilo L. Ngela

Wadau wa Elimu katika Wilaya ya Nanyumbu wakiongozwa na Mkuu wa Wilaya ya Nanyumbu Mhe. Moses J. Machali wamekutana mapema leo Januari 05, 2018 katika viwanja vya Shule ya Sekondari Mangaka katika kuadhimisha siku ya Elimu kiwilaya. Miongoni mwa washiriki katika siku hii mhimu kielimu ni pamoja na Mhe. Dua W. Nkurua (Mb), Kamati ya Ulinzi na Usalama ya Wilaya, Uongozi wa CCM (W), Wakuu wa Idara na Vitengo, Waratibu Elimu Kata, Watendaji wa Kata na Vijiji, Viongozi wa Bodi za Shule, Wadau mbalimbali wa Elimu, Walimu, Wazazi na Wanafunzi.

Uongozi wa Wilaya ya Nanyumbu umeamua kuiteua siku hii, ili kupokea Taarifa mbalimbali za Elimu Msingi na Sekondari, Taarifa ya Mthibiti Ubora wa Shule, Kujadili kwa kina hali ya Elimu na mwelekeo kwa mwaka 2019 ikiwa ni pamoja na ugawaji Tuzo. Siku ya Elimu iliasisiwa na Mkuu wa Mkoa wa Mtwara Mhe. Gelasius Gasper Byakanwa ambaye alizitaka Wilaya zote kufanya Tathmini ya hali ya Elimu kila mwaka ili kubaini kama Wilaya inapanda au inashuka ikiwa ni pamoja na kuchukua hatua stahiki  

Mkuu wa Wilaya ya Nanyumbu akizungumza katika maadhimisho hayo amewataka watumishi wote katika Sekta ya Elimu kuhakikisha wanafanya kazi kwa uaminifu huku wakitanguliza mbele maslahi ya umma. Mhe. Machali amelaani vikali tabia ya wazazi kuwashawishi watoto kujifelisha katika mitihani ili kukwepa jukumu la kuwasomesha. Mkuu wa Wilaya amewakumbusha wananchi kushiriki shughuli za ujenzi wa miundombinu ya shule, kuwapatia watoto chakula, kudhibiti utoro na uzembe kwa wanafunzi, kushughulikia maslahi ya walimu ikiwa ni pamoja na kuhakikisha walimu wanakuwa na maandalio ya masomo pamoja na zana zote mhimu za kufundisha na kujifunzia.

Pamoja na Changamoto mbalimbali ikiwepo uhaba mkubwa wa walimu, Wilaya ya Nanyumbu imeendelea kupanda mwaka hadi mwaka katika matokeo ya darasa la saba. Mwaka 2016 kulikuwa na asilimia 32.53 ya wanafunzi waliofaulu huku asilimia hiyo ikipanda mwaka 2017 ambapo wanafunzi walifaulu kwa asilimia 51.48 na kupanda zaidi mwaka 2018 ambapo ufaulu  ulifika asilimia 72.22.

Wadau mbalimbali waliohudhuria Siku ya Elimu wilayani Nanyumbu walitoa ushauri na maoni mbalimbali ya namna ya kuinua kiwango cha Elimu Wilayani Nanyumbu. Pamoja na maoni hayo pia wadau hao wa Elimu wakiongozwa na Mkuu wa Wilaya ya Nanyumbu wamekusudia kufanya mapinduzi makubwa ya kielimu ili kuhakikisha Nanyumbu inakuwa mfano bora wa kuigwa kielimu.