Mpango wa TASAF waja na matokeo chanya Nanyumbu

Posted on: July 7th, 2024

Afisa Ufuatiliaji wa TASAF Wilaya ya Nanyumbu Ndg. Christian Mchopha (wa tatu kulia) akizungumza na wanufaika wa Mpango wa TASAF

Na, Lunanilo Ngela

Wanufaika wa Mpango wa Maendeleo ya Jamii (TASAF) Wilaya ya Nanyumbu wametoa shukrani zao za dhati kwa Rais wa Tanzania Mhe. Dkt. Samia Suluhu Hassan, wakati wakielezea matokeo chanya waliyopata kwenye mpango huo wa kitaifa ulioanzishwa mwaka 2000 na Serikali.

Wakizungumza Julai 05, 2024 wakati wakipokea fedha za Mpango za mwezi Machi na Aprili katika bajeti ya 2023/2024, kiasi cha shilingi milioni 377.6, wanufaika hao walisema kuwa mpango huo umekuwa nguzo muhimu katika kuboresha maisha yao na kuwawezesha kuanzisha shughuli mbalimbali za kiuchumi.

Bi. Awetu Alfani wa Kijiji cha Mnanje B alisema “Fedha niliyopewa nilitumia kununua kuku watano na kuanza safari ya ufugaji. Nilifanikiwa kuwa na kuku 250.” aliongeza kuwa aliuza baadhi ya kuku na kununua bati na kuezekea nyumba anayoishi sasa kwani hapo awali alikuwa anaishi kwenye nyumba ya nyasi.

Mnufaika mwingine, Bi. Mwajuma Athumani wa Mnanje A, alieleza kuwa alipata shilingi laki tatu na nusu kutoka ruzuku ya uzalishaji zilizomwezesha kujenga banda la kuku na kuanza ufugaji. "Nilianza na kuku 12 na sasa nina kuku 46. Ufugaji wa kuku umekuwa chanzo kikubwa cha kipato kwa familia yangu, huniwezesha kusomesha watoto na kumudu gharama za maisha," alieleza Bi. Mwajuma.

Naye Bi. Mwanahawa Mkane wa Mnanje B, mnufaika wa mpango huo, alisema kuwa fedha alizopata kutoka TASAF zimemwezesha kuanzisha ufugaji wa bata na kuku. Pia, fedha hizo zimemsaidia kununua chakula na kugharamia matibabu. "Nimenunua redio pia ili niwe nasikiliza taarifa za habari," aliongeza Bi. Mwanahawa.

TASAF imekuwa mkombozi kwa wananchi wenye kipato cha chini Wilaya ya Nanyumbu. Mpango huo umesaidia kuboresha maisha ya walengwa kwa kuwawezesha kuanzisha shughuli mbalimbali za kiuchumi kama vile ufugaji, kilimo, na biashara ndogo ndogo. Kupitia Mpango huo, wanufaika wana matumaini mapya ya kujitegemea kiuchumi.