Mkutano wa Baraza la Madiwani Nanyumbu kuanza leo

Posted on: April 29th, 2019

Makamu M/Kiti wa Baraza la Madiwani Nanyumbu Mhe. Benjamini R. Masimbo akifungua mkutano katika Ukumbi wa Halmashauri

Na, Lunanilo L. Ngela

Mkutano wa Robo ya Tatu 2018/2019 wa Baraza la Madiwani wa Halmashauri ya Wilayani Nanyumbu umefanyika mapema leo katika Ukumbi wa Halmashauri. Katika Mkutano huo, Taarifa  za Kata 17 za Halmashauri ya Wilaya ya Nanyumbu ambazo ni Kamundi, Masuguru, Lumesule, Nangomba, Mikangaula, Mnanje, Maratani, Michiga, Napacho, Nanyumbu, Mangaka, Kilimanihewa, Nandete, Sengenya, Chipuputa, Likokona na Mkonona zimejadiliwa kwa kina.

Wenyeviti wa Kamati za Maendeleo za Kata wakizungumzia suala la Elimu katika Taarifa zao, wameelezea hatua mbalimbali za Ujenzi wa miundombinu inayoendelea katika Shule mbili mpya za  Sekondari Masuguru na Marata. Shule hizi zimeanza mwaka huu (2019) na kupewa usajili. Aidha, wananchi wa Kata hizo wakishirikiana na Serikali wanaendelea na ujenzi wa maabara, nyumba za walimu pamoja na Ofisi.

Madiwani katika Taarifa zao wameelezea Ujenzi mbalimbali wa miundombinu unaoendelea katika Kata zao ikiwemo Ujenzi wa madarasa, nyumba za walimu, zahanati, vituo vya Afya, miundombinu ya maji, na vyoo. Aidha, wametoa pongezi za dhati kwa Serikali inayoongozwa na Rais wa Jamhuri ya Muungano wa Tanzania Mhe. Dr, John Pombe Magufufli kwa kupeleka fedha za miradi vijijini katika sekta mbalimbali ikiwemo Elimu, Afya, Maji pamoja na mawasiliano.

Kaimu katibu tawala wa Wilaya ya Nanyumbu Ndg. Baraka Mlahagwa akizungumza katika mkutano huo amesema kuwa, zoezi la ugawaji wa vitambulisho vya wajasiliamali linaendelea. Aidha, Jumla ya vitambulisho 4,150 kati ya 9,000 vimegawiwa kwa wajasiliamali na kuwataka watendaji wa Kata kuongeza kasi ya kuvigawa vitambulisho hivyo ili kuwaondolea usumbufu wa ushuru na tozo mbalimbali wafanyabiashara wadogo wadogo.

Mkutano wa Baraza la Madiwani utaendelea kesho Tarehe 30/04/2019 ambapo Kamati mbalimbali za Kudumu za Halmashauri ambazo ni:- Kamati ya Fedha Utawala na Mipango, Kamati ya Huduma za Jamii (Elimu, Afya na Maji), Kamati ya Huduma za Uchumi, Ujenzi na Mazingira pamoja na Kamati ya Kudhibiti UKIMWI zitawasilisha Taarifa zake na kijadiliwa na wajumbe.