DC Magala: “Msipokee Wafugaji Kinyume cha Taratibu”

Posted on: September 1st, 2025

Mkuu wa Wilaya ya Nanyumbu akizungumza na wenyeviti wa vijiji pamoja na watendaji Kata na vijiji

Na; Lunanilo Ngela

Mkuu wa Wilaya ya Nanyumbu, Mheshimiwa Christopher Edward Magala, ametoa onyo kali kwa viongozi wa vijiji na kata watakaowaruhusu wafugaji kuingia na kuishi katika maeneo yao kinyume cha taratibu na sheria zilizowekwa.

Akizungumza Septemba 1, 2025 katika kikao kazi kilichowakutanisha wenyeviti na watendaji wa vijiji na kata kwenye ukumbi wa Shule ya Wasichana Mkapa, Mhe. Magala alisema kuwa wafugaji wote wenye vibali wanapaswa kufuata mpango wa matumizi bora ya ardhi kwa kuishi na kulisha mifugo yao kwenye vitalu maalum vilivyotengwa na Halmashauri.

Alibainisha kuwa utekelezaji wa mpango wa matumizi bora ya ardhi ni muhimu ili kuepusha migogoro kati ya wakulima na wafugaji, na kusisitiza kuwa hatasita kuchukua hatua kwa mtu yeyote atakayebainika kukiuka maagizo hayo.

Kwa upande wake, Mkurugenzi Mtendaji wa Halmashauri ya Wilaya ya Nanyumbu, Ndg. Ibrahim John Mwanauta, alionya kuwa mtu yeyote atakayewavusha wafugaji au kuwapatia makazi kwa njia za kinyemela atachukuliwa hatua kali za kisheria.

Migogoro ya wakulima na wafugaji imekuwa ikiripotiwa mara kwa mara, ambapo wakulima wanalalamikia makundi makubwa ya ng’ombe kutoka wilaya jirani kuvamia mashamba yao na kuharibu mazao.

"Kura Yao, Haki Yako - Jitokeze Kupiga Kura"