Elimu ya Saratani ya Matiti Yatolewa kwa Viongozi na Watoa Huduma za Afya ya Msingi Nanyumbu

Posted on: September 12th, 2025

Mganga Mkuu wa Wilaya ya Nanyumbu, Ndugu Marco Mazanzagar, amefungua semina elekezi kwa viongozi wa jamii na watoa huduma za afya ya msingi kuhusu saratani ya matiti.

Akizungumza katika semina hiyo iliyofanyika Septemba 12, 2025 katika ukumbi wa Shule ya Msingi Mangaka, Dkt. Mazanzagar alisema lengo kuu ni kuongeza uelewa wa jamii kuhusu ugonjwa huo, umuhimu wa uchunguzi wa mapema, na kujenga mabalozi wa afya katika ngazi ya jamii.

Washiriki walipata elimu juu ya ukubwa wa tatizo la saratani ya matiti nchini, ambapo visa vya ugonjwa huu vinaongezeka kila mwaka. Dkt. Mazanzagar alisisitiza kuwa matibabu ya haraka ni njia bora ya kupunguza madhara na kuokoa maisha.

Mratibu wa Afya ya Mama na Mtoto Wilaya ya Nanyumbu, Bi. Emerensiana Lukanga, alieleza kuhusu mradi wa uchunguzi wa saratani ya matiti unaotekelezwa na Wizara ya Afya kwa kushirikiana na TAMISEMI na Jhpiego, kwa ufadhili wa Pfizer Foundation. Mradi huo unatekelezwa kuanzia mwaka 2025 hadi 2027 katika mikoa 11 ya Tanzania Bara na Zanzibar.

Aidha, Bi. Lukanga alitaja visababishi vya saratani ya matiti kama vile historia ya familia, unene kupita kiasi, kutonyonyesha, matumizi ya pombe na tumbaku, ukosefu wa mazoezi, kuanza hedhi mapema na kukoma hedhi kuchelewa. Aliongeza kuwa dalili kuu ni uvimbe kwenye titi au kwapa, mabadiliko ya chuchu, maumivu yasiyo ya kawaida, na kutoka kwa majimaji yasiyo ya kawaida kwenye chuchu.

Washiriki walihimizwa kujichunguza mara kwa mara, kufanya vipimo vya afya kila mwaka, kula vyakula bora na kufanya mazoezi. Pia walikubaliana kutoa elimu kwa wananchi na kusaidia wenye dalili za ugonjwa kupata matibabu mapema.