Mbunge wa Jimbo la Nanyumbu apongezwa na Halmashauri kuu ya CCM Wilaya

Posted on: March 4th, 2020

Mbunge wa Jimbo la Nanyumbu Mhe. Dua Willium Nkurua akiwasilisha taarifa ya Utekelezaji wa Ilani kwa kipindi Cha 2015-2020

Na, Lunanilo L. Ngela

Wajumbe wa Halmashauri Kuu ya CCM Wilaya ya Nanyumbu wakiongozwa na Mwenyekiti wa CCM Wilaya Ndg. Rashidi Ally Mrope wamempongeza Mbunge wa Jimbo hilo Mhe. Dua William Nkurua kwa kutekeleza vema majukumu yake ya Ubunge. Wajumbe hao wametoa pongezi hizo baada ya Mbunge huyo kuwasilisha taarifa yake ya Utekelezaji wa Ilani kwa kipindi Cha 2015-2020.

Katika taarifa hiyo Mhe. Dua pamoja na kuhamasisha Maendeleo jimboni kwake amepambana kuhakikisha anapata fedha za Miradi ya Maendeleo kupitia Wizara mbalimbali ambapo Nanyumbu imeingiziwa Fedha za upanuzi wa Miradi ya Maji Shilingi Bilioni 1.3, Ujenzi wa bwawa Maratani Shilingi Milioni 450 na Fedha za kuchimbia visima virefu Milioni 50. Aidha, Serikali ipo mbioni kutekeleza Mradi Mkubwa wa Maji toka mto Ruvuma na kusambaza wilayani humo.

Katika ziara ya Waziri wa Afya aliyoifanya Nanyumbu, Mhe. Mbunge aliomba mashine ya Mionzi kwa ajili ya Hospitali ya Wilaya na akapewa mashine yenye thamani ya zaidi ya Milioni 200. Tayari ujenzi wa jengo la Mionzi umekamilika. Aidha, Wizara pia imeipatia Nanyumbu Shilingi Milioni 400 kwa ajili ya Ujenzi wa Kituo Cha Afya Mtambaswa, Milioni 400 kwa ajili ya Ujenzi wa Wodi ya wazazi Mangaka na Milioni 200 kwa ajili ya Ujenzi wa Kituo Cha Afya Mikangaula.

Mheshimiwa Dua katika kutatua changamoto ya Mawasiliano wilayani Nanyumbu alifanikiwa kuwasilisha kero hiyo kwenye Wizara ya Ujenzi, Uchukuzi na Mawasiliano na tayari Nanyumbu imejengewa minara katika vijiji vya Magomeni, Sengenya, Songambele, Nangomba, Lowasa, Mkonona, Marumba, Chigweje, Chipuputa, Mkohora, Masuguru, Mtambaswala, Kazamoyo, Michiga, Nandete, Mnanje na Mkuula. Aidha huko Mbangala Mbuyuni na Napacho ujenzi wa minara unaendelea. Mhe. Dua pia ni Mjumbe katika Kamati ya Bunge ya Miundombinu.

Makamu Mwenyekiti wa Halmashauri Mhe. Raphael Masimbo pamoja na Mkurugenzi Mtendaji wa Halmashauri Ndg. Hamis H. Dambaya wamempongeza Mhe. Dua kwa namna anavyoshirikia vema na Halmashauri hiyo katika kusukuma mbele gurudumu la Maendeleo

Mwenyekiti wa CCM Wilaya akifunga mkutano huo amewataka wajumbe pamoja na Watendaji wa Serikali katika ngazi ya Wilaya kuendelea kujituma na kufanya kazi kwa moyo. Naye Katibu wa CCM Wilaya Ndg. Didas Zimbihile amesisitia umoja na mshikamano miongoni mwa wanachama.