Maeneo ya utalii Nanyumbu yamvutia Naibu Waziri Maliasili na Utalii

Posted on: July 31st, 2018

Naibu Waziri Maliasili na Utalii Mh.Japhet Hasungu (wanne toka kushoto) akisikiliza kwa makini maelezo ya askari wa wanyamapori wakati alipotembelea hifadhi ya Lukwika Lumesule iliyopo Wilayani Nanyumbu

Wilaya ya Nanyumbu ni miongoni mwa Wilaya chache nchini Tanzania zenye vivutio vingi vya utalii ikiwemo hifadhi kubwa za wanyamapori, milima mirefu na yenye mawe ya ajabu, maeneo ya kihistoria pamoja na mito mikubwa yenye madaraja ya kiutalii. Akizungumza na viongozi wa Wilaya ya Nanyumbu, Mh Japhet Hasungu (Naibu Waziri wa Maliasili na Utalii) amesema kuwa ameshangazwa na kuvutiwa na mawe ya ajabu yaliyopo kijiji cha Lumesule katika Wilaya ya Nayumbu, hifadhi nzuri na kubwa ya wanyamapori ya Lukwika Lumesule pamoja na daraja la Umoja la Mtambaswala ambalo ni kivutio kikubwa kwa watalii wa ndani na nje ya nchi. Mh. Naibu Waziri amewaagiza viongozi wa Wilaya ya Nanyumbu kuhakikisha wanautangaza mara moja utalii huu mkubwa ili wageni na watalii toka ndani na nje ya nchi waje kutembelea vivutio hivyo.

Tanzania hakika hii ndiyo Edeni inayotajwa katika vitabu vitakatifu! ameyasema haya Mh. Hasungu huku akitaja utajiri mkubwa uliopo Tanzania kama maziwa na mito mikubwa, milima mirefu mfano Kilimanjaro, mbuga kubwa za kuvutia zilizojaa wanyama wa kila aina, uoto wa asili na ardi yenye rutuba, maeneo ya kihistoria ikiwa ni pamoja na vivutio vingine vingi ambavyo havipo katika mataifa mengine. Aidha, Mh Naibu Waziri amesema kuwa muda umefika sasa kwa kila mwananchi kujivunia na kuutangaza utalii wa nchi yetu.

Mkurugenzi Mtendaji wa Wilaya ya Nanyumbu Ndugu Hamis H. Dambaya amesema kuwa Halmashauri ya Wilaya ya Nanyumbu inaendelea na jitihada ya kuibua na kutangaza vyanzo mbalimbali vya utalii. Nae Katibu Tawala wa Wilaya ya Nanyumbu Ndugu Salum Palango amemshukuru sana Mh. Naibu Waziri wa Maliasili na Utalii kwa kuitembelea Nanyumbu na kutoa maelekezo mbalimbali ya namna ya kuiboresha sekta ya maliasili na Utalii. Aidha, Ndugu Palango amemhakikishia Mh. Naibu Waziri kuwa vivutio vyote vya utalii na maeneo yote ya kihistoria yataendelea kutangazwa na kuhifadhiwa ili kuboresha utalii na kukuza kipato cha Wilaya ya Nanyumbu na Taifa kwa ujumla.

Nanyumbu inawakaribisha watu wote wa ndani na nje ya nchi yetu kuja kutembelea hifadhi ya Wanyamapori ya Lukwika Lumesule, Kutembelea daraja la Umoja Mtambaswala pamoja na kujionea mawe ya ajabu, milima na maeneo mbalimbali ya kihistoria.