Madaktari Nanyumbu watowa semina juu ya Saratani ya mlango wa kizazi

Posted on: April 25th, 2018

Mkuu wa Wilaya ya Nanyumbu Mh. Selemani Mzee (katikati), Mganga Mkuu wa Wilaya ya Nanyumbu Dr. Furaha Mwakafwila (kulia) na Kaimu Katibu Tawala wa Wilaya ya  Nanyumbu Ndg. Marco Mapunda (kushoto) pamoja na wajumbe wa Kamati ya Afya ya Msingi wa Wilaya ya Nanyumbu wakimsikiliza kwa makini Mratibu wa Chanjo Nanyumbu Dr. Haridi Sungura (aliyesimama) wakati akielezea Kansa ya mlango wa kizazi mapema leo katika Ukumbi wa Halmashauri ya Wilaya ya Nanyumbu. Dr. Sungura akitowa mafunzo hayo amesema kuwa:,

Saratani ya mlango wa uzazi ni mabadiliko ya ukuaji wa seli za mlango wa kizazi. Mabadiliko haya husababisha misuli au viungo vingine mwilini kuathirika. Saratani iliyojipenyeza ndani maana yake imesambaa na kushambulia misuli na viungo vingine ndani ya mwili. Saratani hii inaweza kusambaa na kuweza kushambulia kibofu cha mkojo, uke na sehemu ya chini ya utumbo mkubwa na baadaye figo, ini na sehemu zingine.

Saratani ya mlango wa kizazi ina athari kubwa kwa afya ya wanawake ulimwenguni kote. Inakadiriwa kuwa kila mwaka kati ya wanawake 466,000 wanathibitika kuwa na saratani ya mlango wa kizazi, na  wengi wao wako katika nchi zinazoendelea. Saratani ya mlango wa kizazi inashuka nafasi ya pili kwa kusababisha saratani kwa wanawake. Nafasi ya kwanza inashikwa na saratani ya matiti.

Karibu saratani zote za mlango wa kizazi husababishwa na virusi vya Human Papilloma. Kuna aina zaidi ya 40 ya virusi vya Human Papilloma vinavyoweza kusababisha maambukizi kwenye njia za uzazi za wanawake na wanaume, mdomoni na kwenye koo. Miongoni mwa wanawake wanaoambukizwa virusi hivi, asilimia 10 ndio hupata dalili za awali za ugonjwa wa saratani na baadaye saratani yenyewe baada ya miaka 10 hadi 20.

Visababishi vya maambukizi ni;

• Kuanza kujamiana katika umri mdogo
• Kuwa na wapenzi wengi
• Kuwa na ndoa za mitala
• Kuzaa watoto wengi
• Uvutaji sigara

Dalili za Saratani ya mlango wa kizazi ni;

• Kutokwa damu bila mpangilio au kutokwa damu baada ya kujamiana
• Maumivu ya mgongo, miguu na au kiuno
• Kuchoka, kupungua uzito, kupungikiwa hamu ya kula
• Kutokwa uchafu uchafu kwenye uke wa majimaji, uliopauka wa rangi kahawia au wenye damu
• Kuvimba mguu mmoja

Dalili mbaya zaidi zinazoweza kujitokeza ni pamoja na;

• Kuishiwa damu
• Figo kushindwa kufanya kazi
• Kupatwa na fistula, na uvimbe wa tezi

Kinga ya Saratani ya Mlango wa Kizazi

• Kinga ya awali ni pamoja na:
• Kupata chanjo ya kuzuia saratani ya mlango wa kizazi (HPV vaccine),
• Kubadili tabia,
• Kuepuka ngono katika umri mdogo,
• Kuepuka uvutaji wa sigara,
• Kuepuka kubeba mimba katika umri mdogo na kuwa na mwenzi mmoja mwaminifu.
• Kinga kwenye hatua za mwanzo ni kufanyiwa uchunguzi wa kina ili kubaini dalili za mwanzo na kupata matibabu stahiki.

Mkuu wa Wilaya Mh. Selemani Mzee amewapongeza watendaji wa Afya na kuwataka kufikisha mafunzo haya kwa jamii yote ya Nanyumbu ili kukabiliana na Saratani ya mlango wa kizazi. Aidha, amewataka watendaji wote wa Serikali ngazi ya Wilaya kuendelea kusimamia na kuhakikisha wasichana wote wenye umri wa miaka kumi na nne (14) wanajitokeza kupewa chanjo ya saratani hii zoezi lililoanza tangu tarehe 23/04/2018 na litakamilika tarehe 29/04/2018 katika Wilaya ya Nanyumbu.