Kamati ya Siasa Mkoa wa Mtwara yatua Nanyumbu

Posted on: June 23rd, 2018

Kamati ya Siasa ya Halmashauri kuu ya Chama cha Mapinduzi Mkoa wa Mtwara ikiongozwa na Ndugu Yusuph S. Nannila (anayeongea) imefanya ziara mapema leo katika Wilaya ya Nanyumbu kukagua miradi ya maendeleo inayotekelezwa wilayani humo ikiwa ni katika kutekeleza Ilani ya Uchaguzi ya Chama cha Mapinduzi ya Mwaka 2015. Ilani ya Chama Cha Mapinduzi ilitolewa na Halmashauri Kuu ya CCM Agosti 2015 ikionesha Dira ya maendeleo ya Taifa. Aidha, Katika kipindi cha miaka mitano (2015-2020) Chama cha Mapinduzi kikiwa madarakani kimezielekeza Serikali zake kuhakikisha zinapambana na changamoto zinazozitajwa katika Ilani ambazo ni pamoja na; kuondoa umaskini, kupunguza tatizo la ukosefu wa ajira na hasa kwa vijana, kuendeleza vita dhidi ya rushwa na ubadhilifu wa mali ya umma, kuendelea kudumisha amani, ulinzi na usalama wa maisha ya wananchi na mali zao.

Kamati ya Siasa Mkoa imetembelea miradi mbalimbali ya maendeleo Wilayani Nanyumbu. Miradi hiyo ni pamoja na:-

• Matengenezo ya kawaida ya Barabara za Mangaka mjini (Km 6), Mangaka-Nachingwea (Km 34), Michiga-Mburusa (Km 17.3), Holola-Mnanje (Km 6.8), Mikuva-Ngupe (Km 5.8), Mnanje-Nakole (km 13) na Nandete-Ulanga (Km 10.9). Gharama ya ujenzi wa barabara hizi ni Shilingi 81,593,017.50 na kazi ya matengenezo ya barabara hizo inaendelea. 
• Ujenzi wa Madarasa manne, ofisi mbili za walimu na vyoo kumi na mbili katika Shule ya Msingi Nahawara.
• Ujenzi wa Zahanati ya Kijiji cha Chipuputa
• Ujenzi wa Kituo cha Afya Mikuva
• Mradi wa maji safi Nandete
• Kukagua na kuona shughuli za kikundi cha BODABODA cha KM cha Mjini Mangaka

Uongozi wa Chama cha Mapinduzi umetoa pongezi za dhati kwa Wilaya ya Nanyumbu kwa kuratibu na kusimamia Miradi mbalimbali ya Maendeleo. Mwenyekiti wa CCM amekipongeza kikundi cha vijana cha BODABODA cha KM kwa kulipa mkopo wao waliokopeshwa na Halmashauri kwa wakati. Aidha, ameiagiza Halmashauri kuhakikisha inatowa mikopo kwa vijana na wanawake kama Ilani ya Chama cha Mapinduzi inavyoagiza. Chama cha Mapinduzi pia Kimetowa mchango wa mifuko ya simenti kwa ajili ya ujenzi wa Zahanati ya Mikuva na ujenzi wa Ofisi ya kijiji cha Nahawara. Kamati ya Siasa imemwagiza Kaimu Mkurugenzi wa Wilaya ya Nanyumbu Ndg Lwoga Musijaki  kuhakikisha mkandarasi aliyepewa mradi wa maji Nandete anakabidhi mradi kwa wakati ili wananchi waweze kupata maji safi kwa haraka.

Wananchi wa Wilaya ya Nanyumbu wakizungumza na Ofisi ya Habari Nanyumbu wamesema wanaupongeza sana uongozi wa Chama Cha Mapinduzi Mkoa wa Mtwara kwa kuhakikisha unatembelea na kukagua Miradi ya Maendeleo ili kuona namna watendaji wa Serikali wanavyotekeleza Ilani ya Uchaguzi ya Chama Cha Mapinduzi ya mwaka 2015. Aidha, wananchi wameendelea kutowa shukrani zao za dhati kwa Serikali kwa kuhakikisha zao la korosho linakuwa na soko zuri. Kamati ya Siasa Mkoa imewaahidi wananchi kuwa ipo nao bega kwa bega ili kuhakikisha kero za wanchi zinatatuliwa kwa wakati.