Jamii Yaaswa Kulinda Haki za Watoto

Posted on: June 13th, 2025

Afisa Tarafa ya Nanyumbu akizungumza wakati wa Maadhimisho ya Siku ya Mtoto wa Afrika kiwilaya

Na, Lunanilo Ngela

Jamii imetakiwa kuhakikisha inalinda na kutetea haki za watoto kama ilivyoainishwa katika Sera ya Maendeleo ya Mtoto ya mwaka 2008, ikiwemo haki ya kuishi, kuendelezwa, kulindwa, kushirikishwa na kutobaguliwa.

Wito huo umetolewa na Afisa Tarafa ya Nanyumbu, Ndugu Livinus Nchimbi, tarehe 13 Juni 2025, wakati akimwakilisha Mkuu wa Wilaya ya Nanyumbu katika maadhimisho ya Siku ya Mtoto wa Afrika yaliyofanyika kiwilaya katika Kijiji cha Namijati, Kata ya Mkonona.

Katika maadhimisho hayo, watoa mada kutoka Dawati la Jinsia, Idara ya Ustawi wa Jamii pamoja na mashirika yasiyo ya kiserikali walieleza umuhimu wa kutambua na kulinda haki za watoto, sambamba na hatua zinazopaswa kuchukuliwa pale haki hizo zinapovunjwa.

Aidha, vikundi mbalimbali vya sanaa vilitoa burudani na elimu kupitia maigizo, mashairi na nyimbo, huku wanajamii wakikiri kufaidika na elimu ya haki za watoto iliyotolewa kupitia hotuba, mada na sanaa ya vikundi hivyo.

Siku ya Mtoto wa Afrika huadhimishwa kila mwaka ifikapo Juni 16, ikiwa ni kumbukizi ya mauaji ya kikatili ya wanafunzi wa Afrika Kusini mwaka 1976, waliouawa wakati wakidai haki yao ya kupata elimu bora dhidi ya utawala wa kibaguzi wa Makaburu.

Kaulimbiu ya maadhimisho ya mwaka 2025 ni: “Haki za Mtoto; Tulipotoka, Tulipo na Tuendako.”