DC Ngollo Malenya Apongeza Baraza la Madiwani Nanyumbu kwa Kujifunza Biashara ya Kaboni Namtumbo

Posted on: October 22nd, 2024

Mkuu wa Wilaya ya Namtumbo (wa tatu kushoto) akiwa katika picha ya pamoja na Mwenyekiti wa Halmashauri ya Nanyumbu (wa pili kushoto), Makamu Mwenyekiti (wa tatu kulia) na Wenyeviti wa Kamati za Kudumu za Halmashauri

Na; Lunanilo Ngela

Mkuu wa Wilaya ya Namtumbo, Mhe. Ngollo Malenya, amewapongeza madiwani wa Halmashauri ya Wilaya ya Nanyumbu, wakiongozwa na Mwenyekiti wao, Mhe. Benjamin Masimbo, kwa kutembelea Wilaya ya Namtumbo tarehe 22 Oktoba 2024, kwa lengo la kujifunza kuhusu utekelezaji wa biashara ya kaboni.

Akizungumza na madiwani hao walipofika ofisini kwake, Mhe. Malenya alisema kuwa biashara ya kaboni ni chanzo muhimu cha mapato kwa Wilaya ya Namtumbo, kwani inasaidia kukuza uchumi na kuhifadhi mazingira. Alisisitiza umuhimu wa kubadilishana uzoefu katika masuala ya kiuchumi ili kuimarisha maendeleo ya kiuchumi na kijamii katika halmashauri hizo.

Mkurugenzi Mtendaji wa Halmashauri ya Wilaya ya Namtumbo, Ndg. Philemon Magesa, alibainisha kuwa biashara ya kaboni inatekelezwa katika jumuiya za hifadhi za Kimbanda, Kisungule, na Mbarang’andu, katika vijiji 18 vya kata 8 tangu mwaka 2022.

Aidha, Afisa Maliasili wa Wilaya, Bi. Prisca Msuha, alisema kuwa vijiji na halmashauri vimepokea zaidi ya shilingi milioni 373.5 kutoka kampuni ya CT Limited, inayotekeleza mradi huo. Fedha hizo zimetumika kuboresha miradi mbalimbali ya maendeleo vijijini, ikiwemo huduma za elimu na afya, pamoja na kusaidia kupunguza ukataji holela wa misitu ili kuzalisha krediti za kaboni.

Biashara ya kaboni ni mfumo wa soko unaoruhusu nchi au makampuni kununua na kuuza haki za kutoa kaboni dioksidi, ulioanzishwa kupitia Itifaki ya Kyoto chini ya Mkataba wa Umoja wa Mataifa wa Mabadiliko ya Tabianchi mwaka 2005. Nchini Tanzania, miradi hii imeingiza zaidi ya shilingi bilioni 25 kutoka masoko ya kaboni.