DC Magala Apita Kitongoji kwa Kitongoji Akihamasisha Kupiga Kura, Uhamiaji Waonya Wanaovusha Wageni

Posted on: October 15th, 2025

Na, Lunanilo Ngela

Mkuu wa Wilaya ya Nanyumbu, Mheshimiwa Christopher Edward Magala, amefanya ziara katika vitongoji vya Wanika, Namaromba na Mkongo vilivyopo Kata ya Mkonona, mpakani mwa Tanzania na Msumbiji, kwa lengo la kuhamasisha wananchi kujitokeza kwa wingi kupiga kura ifikapo Oktoba 29, 2025, pamoja na kuimarisha masuala ya ulinzi na usalama.

Akizungumza katika mikutano hiyo ya hadhara, Mheshimiwa Magala amewahimiza wananchi kushiriki kikamilifu katika shughuli za ulinzi na usalama, kuwafichua watu wenye nia ya kuvuruga amani kipindi cha uchaguzi, na kutumia mitandao ya kijamii kwa manufaa ya kujenga umoja wa kitaifa badala ya kueneza taarifa za upotoshaji.

Kwa upande wake, Afisa Uhamiaji wa Wilaya ya Nanyumbu, SI – Hendrick Mtui, amewaonya wananchi wanaowavusha au kuwapokea wageni wanaoingia kutoka nchi jirani bila kufuata taratibu za kisheria.

Aidha, Afisa huyo amesisitiza kuwa ni wajibu wa kila mwananchi kuwatambua na kutoa taarifa kuhusu wageni wote wanaoingia katika vitongoji au vijiji vyao, ili kuimarisha ulinzi na kudhibiti uhalifu unaoweza kujitokeza.

Nao wananchi wa vitongoji hivyo wamepongeza ziara hiyo ya Mkuu wa Wilaya, na wameeleza kuwa tayari wamejiandikisha katika Daftari la Kudumu la Wapiga Kura na watahakikisha wanashiriki kikamilifu kupiga kura ili kutimiza haki yao ya kikatiba ya kuchagua viongozi watakaowatumikia kwa kipindi cha miaka mitano ijayo.