DC Machali awakumbusha wananchi kujiandikisha kwenye Orodha ya Wapiga Kura

Posted on: October 9th, 2019

Mkuu wa Wilaya ya Nanyumbu Mhe. Moses J. Machali akizungumza na wananchi wa kijiji cha Chipuputa wilayani Nanyumbu

Na, Lunanilo Ngela

Wananchi wa Wilaya ya Nanyumbu mkoani Mtwara, wamekumbushwa kujiandikisha kwenye Orodha ya Wapiga Kura katika Vitongoji vyao ili kushiriki Uchaguzi wa Serikali za Mitaa utakaofanyika Novemba 24, 2019.

Akizungumza katika mkutano wa hadhara uliofanyika Kata za Sengenya na Chipuputa, Mkuu wa Wilaya ya Nanyumbu Mhe. Moses J. Machali amewataka wananchi wa Wilaya ya Nanyumbu wenye sifa za kupiga kura kijiandikisha kwenye Orodha ya Wapiga Kura.

Zoezi la Kujiandikisha kwenye Daftari ya Mpiga Kura lilianza mapema Tarehe 8/10/2019 na litakamilika ifikapo Tarehe 14/10/2019. Vituo vya kujiorodheshea hufunguliwa saa 2:00 asubuhi na kufungwa saa 12:00 Jioni.

Mpiga kura anatakiwa kuwa na Sifa zifuatazo:

• Raia wa Tanzania
• Umri wa miaka kumi na nane (18) na kuendelea
• Mkazi wa Eneo la Kitongoji
• Asiye na ugonjwa wa akili uliothibitishwa na Daktari anayetambulika na Serikali au Bodi ya Utabibu
• Awe amejiandikisha kupiga kura katika Kitongoji husika.

Mkuu huyo wa Wilaya akiwa ameongozana na Kamati ya Ulinzi na Usalama alikwenda kujiandikisha kwenye Orodha ya Wapiga Kura katika Kitongoji chake cha Kagera katika Kijiji cha Ngalinje ili kushiriki Uchaguzi wa Serikali za mitaa.

Viongozi mbalimbali wa Vyama vya Siasa akiwemo Katibu wa Chama Cha Mapinduzi Wilaya ya Nanyumbu Comrade, Didas Zimbihile, wametumia haki yao ya kikatiba ya kujiandikisha katika vitongoji wanavyotokea. Ofisi ya Habari Nanyumbu ilifika Kitongoji cha Kumbukumbu Kijiji cha Mangaka siku ya kwanza kabisa na kumkuta Katibu huyo wa CCM akijiandikisha kwenye Orodha ya Wapiga kura ili kushiriki kikamilifu Uchaguzi wa Serikali za Mitaa.