CHAVITA yaendesha mafunzo ya afya na haki za uzazi kwa viziwi Nanyumbu

Posted on: March 3rd, 2023

Katika picha ni Ndg. Kasim Mchindula  Mratibu wa Miradi CHAVITA Mkoa wa Mtwara akizungumza na washiriki wa mafunzo

Na, Lunanilo Ngela,

Uongozi wa Chama cha Viziwi Mkoa wa Mtwara kwa kushirikiana na mfadhili Abilis Foundation, umeandaa na kuendesha mafunzo ya siku mbili kwa viziwi wanawake na vijana wilayani Nanyumbu yanayolenga kuwajengea uwezo walengwa hao katika masuala yahusuyo afya na haki za uzazi.

Akizungumza katika mafunzo hayo Mwenyekiti wa CHAVITA Mkoa wa Mtwara Bi. Farida Seleman amesema kuwa mafunzo hayo yalianza tarehe 02/03/2023 na yatakamilika tarehe 03/03/2023. Aidha, ameeleza kuwa pamoja na kuwajengea uwezo walengwa wa mafunzo hayo pia yanalenga kuendelea kuimarisha mahusiano baina washiriki na watoa huduma za afya.

Mratibu wa Miradi CHAVITA ngazi ya Mkoa Ndg. Kasim Mchindula amesema kuwa tarehe 04/03/2023 kutakuwa na kongamano la ushawishi kuhusu ushiriki wa viziwi katika masuala yahusuyo afya litakalofanyika shule ya Sekondari Mangaka na kuhudhuriwa na Mkuu wa Wilaya ya Nanyumbu Mhe. Mariam Khatibu Chaurembo pamoja na viongozi mbalimbali ngazi ya wilaya na watendaji Idara ya Afya.