Baraza Maalumu la Madiwani Nanyumbu lakutana kujadili Hoja za CAG

Posted on: August 19th, 2019

Katika picha ni Mkuu wa Mkoa wa Mtwara Mheshimiwa Gelasius G. Byakanwa

Na, Lunanilo L. Ngela

Mkuu wa Mkoa wa Mtwara Mheshimiwa Gelasius Byakanwa  amewataka watendaji wa Serikali kutoonesha umahiri wa kujibu hoja za ukaguzi badala yake kuhakikisha hawazalishi hoja hizo.

Katika salamu zake zilizosomwa kwa niaba yake na Mkuu wa Wilaya ya Nanyumbu Mheshimiwa Moses Machali kwenye Baraza la kupitia hoja za Mkaguzi na Mdhibiti Mkuu wa Fedha za serikali, Mkuu wa Mkoa amesema kwamba njia pekee ya kutozalisha hoja ni kuhakikisha taratibu, sheria na kanuni zilizowekwa na serikali zinafuatwa.

Mkuu wa Mkoa amewataka watendaji kujiepusha na vitendo vyote vinavyoweza kuruhusu kufanyika kwa udanganyifu wa fedha za serikali ikiwa ni pamoja na kutumia mashine za kukusanyia mapato (POS) katika vyanzo vyote vya Halmashauri.

Katika Baraza hilo lililofanyika kwenye ukumbi wa Mikutano wa Halmashauri ya Wilaya ya Nanyumbu, Mkuu wa Mkoa ameipongeza Halmashauri kwa kupata Hati Safi (Uniqualified Opinion) na kusema kuwa ni vema watendaji wakaendelea kufanya kazi kwa juhudi na maarifa ili kuwaletea wananchi maendeleo.

Kwa upande wake Mkuu wa Wilaya ya Nanyumbu Mheshimiwa Moses Machali amewataka watendaji na madiwani wa Halmashauri kujitathmini katika utendaji wao wa kazi za kila siku na kuona jinsi ya kukabiliana na hoja zote za ukaguzi kuanzia hoja za ndani mpaka zile za Mdhitibi na Mkaguzi Mkuu wa Fedha za Serikali.

Ameitaka Ofisi ya Mkaguzi na mdhibiti Mkuu wa fedha za serikali kuwa kiungo muhimu katika kutoa ushauri kwa watendaji wa Serikali ili waweze kusimamia vizuri miongozo, sheria, taratibu na kanuni za mapato na matumizi ya fedha za umma.

Mdibiti na Mkaguzi Mkuu wa Hesabu za Serikali kwa Mwaka wa Fedha 2017/2018 alitoa hoja 29 ambazo zote zimejibiwa na menejimenti ndani ya siku 21. Aidha, katika hoja hizo Halmashauri imefanikiwa kutekeleza na kufunga hoja 14 huku hoja 15 zikiwa hatua mbalimbali za utekelezaji.