Nanyumbu yagawa vitambulisho kwa wajasiriamali wadogo

Posted on: December 26th, 2018

Mkuu wa Wilaya ya Nanyumbu Mhe. Moses J. Machali (katikati waliokaa) akiwa kwenye picha ya pamoja na baadhi ya wajasiriamali wa Wilaya ya Nanyumbu

Zoezi la ugawaji wa vitambulisho kwa wajasiriamali wadogo wadogo limezinduliwa mapema leo ya tarehe 26/12/2018 katika viwanja vya Kata ya Mangaka na Mkuu wa Wilaya ya Nanyumbu Mhe. Moses Machali. Zoezi hili ni maalumu kwa wajasiriamali wote ambao mauzo yao hayazidi Shilingi Milioni nne (Tsh. 4,000,000/=) kwa mwaka.

Mkuu wa Wilaya ya Nanyumbu amesema kuwa, Rais wa awamu ya tano Mhe. Dr John Pombe  Magufuli katika kuutambua umuhimu wa wajasiriamali wadogo katika kukuza mtaji wao, ameamua kuwawekea utaratibu mzuri wa kuwatambua na kuwaondolea kodi na tozo mbalimbali ili waweze kukuza mtaji wao. Wajasiriamali hawa wanapewa vitambulisho vitakavyowawezesha kufanya biashara nchini kwa uhuru. Aidha, Mkuu wa Wilaya ameongeza kwa kusema kuwa nia ya Serikali ni kuhakikisha wananchi na hasa wanyonge wanainuka kiuchumi.

Vitambulisho hivi vinapatikana kwa Shilingi elfu ishirini tuu kwa kila kimoja (Sh. 20,000/=) na kitadumu kwa mwaka mmoja wa Serikali. Fomu za kujiandikisha zimesambazwa kata zote 17 za Wilaya ya Nanyumbu na zitapelekwa vijiji vyote kwenye Ofisi za Watendaji wa vijiji. Aidha, Tarehe 20/01/2019 ni siku ya mwisho kwa wajasiriamali wote wadogo kujiandikisha.

Mkurugenzi Mtendaji wa Halmashauri ya Wilaya ya Nanyumbu Ndg. Hamis H. Dambaya ametoa onyo kwa wale wote watakaotumia vitambulisho hivyo kwa kushirikiana na wafanyabiashara wakubwa ili kuwawezesha kukwepa kodi. Aidha, amesisitiza kuwa wale wote watakaopewa vitambulisho wahakikishe anaitumia vema nafasi hii waliyopewa na Rais wa Jamhuri ya Muungano wa Tanzania kwa kukuza mtaji wao.  

Wajasiriamali wadogo wa Wilaya ya Nanyumbu wakizungumza na Ofisi ya Habari Nanyumbu wametoa shukrani zao za pekee kwa Rais wa Jamhuri ya Muungano wa Tanzania Mhe. Dr, John Pombe Magufuli kwa kuwatengenezea mazingira rafiki ili kukuza kipato chao. Aidha, wameiahidi Serikali kuwa  watafanya kazi kwa bidii ili kumpinga adui umaskini, ujinga na maradhi.