Nanyumbu yampokea kwa shangwe Mkuu mpya wa Wilaya

Posted on: August 6th, 2018

Mkuu mpya wa Wilaya ya Nanyumbu Mh. Moses Joseph Machali (Kwenye picha) akizungumza na Viongozi mbalimbali wa Wilaya ya Nanyumbu mara tu baada ya kuwasili ofisini kwake

Furaha, vifijo na Nderemo vimeutawala mji wa Mangaka  mara tu baada ya kuwasili kwa Mkuu mpya wa Wilaya ya Nanyumbu Mh. Moses Joseph Machali akitokea Mtwara ambako ameapishwa mapema leo kuwa Mkuu wa Wilaya ya Nanyumbu. Wilaya ya Nanyumbu kwa mda mrefu haikuwa na Mkuu wa Wilaya kutokana na kuondoka kwa aliyekuwa Mkuu wa Wilaya hiyo Mh. Joachim Wangabo aliyeteuliwa kuwa Mkuu wa Mkoa wa Rukwa. Wananchi hao pamoja na viongozi mbalimbali wa Wilaya ya Nanyumbu wamempokea kwa furaha Mkuu huyo mpya wa Wilaya wakiwa na imani kubwa ya kuiona Wilaya ikisonga mbele kwa kasi katika nyanja mbalimbali.

Mheshimiwa  Moses Joseph Machali akizungumza na Viongozi mbalimbali wa Wilaya ya Nanyumbu amesisitiza kufanya kazi kwa kujituma ili kuharakisha maendeleo. Aidha, Mh. Machali amewashukuru wananchi wa Wilaya ya Nanyumbu kwa kumpokea na ameahidi kufanya kazi kwa moyo na kwa ushirikiano mkubwa.

Wananchi wa Nanyumbu wakiwakilishwa na Mbunge wa Jimbo la Nanyumbu Mh. Dua Nkurua wametowa shukrani za pekee kwa Mh. Rais wa Jamhuri ya Muungano wa Tanzania Dr John Pombe Magufuli kwa kuipatia Nanyumbu Mkuu mpya wa Wilaya. Nanyumbu Inakuhitaji sana! (anasema Mh. Mbunge huku akiwa na furaha kubwa). Baadhi ya wananchi wakizungumza moja kwa moja na Afisa Habari wa Wilaya ya Nanyumbu Ndugu Lunanilo L. Ngela wamesema Mkuu mpya wa Wilaya ni kama tunu waliyotunukiwa watu wa Nanyumbu na wameahidi kushirikiana nae bega kwa bega ili kuwashinda maadui watatu ambao ni umaskini, ujinga na Maradhi.

KARIBU SANA NANYUMBU,  KARIBU SANA MH. MOSES JOSEPH MACHALI