Ziara ya RC Byakanwa neema tupu Nanyumbu

Posted on: September 22nd, 2019

Mkuu wa Mkoa wa Mtwara Mhe. Gelasius G. Byakanwa akizungumza na watumishi wa Wilaya ya Nanyumbu katika ukumbi wa mikutano wa Halmashauri

Na, Lunanilo L. Ngela

Mkuu wa Mkoa wa Mtwara Mhe. Gelasius Byakanwa amefanya ziara ya kikazi mapema leo katika Wilaya ya Nanyumbu na kuzungumza na makundi mbalimbali ya watu wakiwemo Watumishi wa Umma, waheshimiwa Madiwani wa Halmashauri pamoja na wafanyabiashara.

Akizungumza na watumishi wa Umma, Mhe. Byakanwa ameitaka Halmashauri kuwawezesha watumishi kupata viwanja ili kuwaongezea ari ya kufanya kazi ikiwa ni pamoja na kuwafanya wakae ndani ya Wilaya. Aidha, amewataka watumishi hao kuhakikisha wanatafuta fursa za kiuchumi zilizopo Nanyumbu na kuzitumia ipasavyo.

Mkuu wa Mkoa amewataka watu wote walionunua viwanja  Mangaka kuhakikisha viwanja hivyo vinaendelezwa ili kuharakisha ukuaji wa Mji wa Mangaka. Ameitaka Wilaya kutenga eneo kwa ajili ya ujenzi wa Soko la Madini ya Dhahabu baada ya kupatikana kwa taarifa za uwepo wa madini ya Dhahabu katika Wilaya ya Nanyumbu.

Wananchi wamesisitizwa kushiriki Uchaguzi wa Serikali za mitaa utakaofanyika Novemba 24, 2019 ikiwa ni pamoja na kuhakikisha wanajiandikisha kwenye Daftari la wapiga kura. Aidha, Mhe. Byakanwa amewataka watu wenye sifa za kugombea nafasi mbalimbali ikiwemo Wenyeviti wa Vijiji, Wajumbe wa Halmashauri ya kijiji na Wenyeviti wa Vitongoji kujitokeza kugombea.

Mkuu wa Wilaya ya Nanyumbu Mhe. Moses J. Machali katika kuhamasisha kampeni ya Shule ni choo iliyoanzishwa na Mkuu wa Mkoa wa Mtwara amesema kuwa Wilaya inaendelea na ujenzi wa miundombinu mbalimbali ya shule ikiwemo vyoo. Jumla ya Shilingi 5,730,000 pamoja na mifuko 57 ya simenti ilipatikana baada ya wafanyakazi kuchangia ili kuunga mkono ujenzi wa Vyoo katika shule za Msingi na sekondari.