Wilaya ya Nanyumbu yaendelea kung’ara Matokeo ya Kidato cha Sita 2023

Posted on: July 14th, 2023

Na, Lunanilo Ngela

Shule ya Sekondari Mangaka imeendelea kung’ara katika Matokeo ya Kidato cha Sita kwenye Mtihani wa Taifa wa Mwaka 2023 ambapo wanafunzi wote wamefaulu kwa asilimia 100.

Akizungumza na Ofisi ya Habari Nanyumbu, Mkuu wa Shule ya Sekondari Mangaka Ndg. Geofray Kiula ameeleza kuwa, Wanafunzi 70 wa michepuo ya CBG na HKL walifanya Mtihani wa Taifa ambapo wanafunzi 12 walipata Daraja la Kwanza, wakifuatiwa na wanafunzi 52 waliopata Daraja la Pili huku wanafunzi sita waliobaki wakipata Daraja la Tatu.

Katika matokeo hayo, mwanafunzi Fadhila Athuman Athuman mwenyeji wa Kijiji cha Mtokora Kata ya Mangaka aliyesoma Kidato cha kwanza mpaka cha sita katika Shule ya Sekondari Mangaka amepata Daraja la 1.7 na kuamsha ari ya wanafunzi wa Kidato cha kwanza mpaka cha nne katika shule hiyo kujiamini na kujituma zaidi darasani.

Kwa Mwaka 2022, Jumla ya wanafunzi 20 kati ya 59 waliofanya Mtihani wa Taifa wa Kidato cha Sita walipata Daraja la Kwanza, wanafunzi 35 wakipata Daraja la Pili wakifuatiwa na wanafunzi wanne tuu waliopata Daraja la Tatu.

Serikali ilianzisha Kidato cha Tano mwaka 2020 katika Shule ya Sekondari Mangaka ikiwa ni Shule Pekee ya Kidato cha Tano na Sita wilayani humo na kupokea wanafunzi wa kike katika michepuo ya CBG na HKL

Wanafunzi wa Kidato cha Sita Katika Shule ya Sekondari Mangaka wameahidi kuandika rekodi nzuri zaidi katika Mitihani yao ya Taifa ya Mwaka 2024.

Wazazi na Wadau mbalimbali wa Elimu wametoa pongezi kwa wanafunzi pamoja na walimu wa shule hiyo kwa jitihada zao za dhati katika kuhakikisha wanafunzi wanafaulu na kuendelea na masomo katika Taasisi za Elimu ya Juu. Aidha, wameishukuru Serikali kwa kuendelea kuboresha miundombinu ya shule za Sekondari katika Wilayani hiyo.

Katika Mwaka 2023 Serikali Kuu imeipatia Wilaya ya Nanyumbu Jumla ya Shilingi Bilioni 3 kwa ajili ya ujenzi wa Shule Mpya ya Kitaifa ya Wasichana itakayojengwa eneo la Naishero Mangaka ambayo itakuwa na wanafunzi wa Kidato cha Kwanza mpaka cha Sita.

Wanafunzi wa Kidato cha Sita katika shule ya Sekondari Mangaka kwa Mwaka 2023 wakiendelea na masomo darasani.

Wanafunzi wa Kidato cha Sita wajipanga kuacha rekodi nzuri katika Matokeo yao ya Mwaka 2024

Masomo yakiendelea darasani kwa wanafunzi wa kidato cha sita 2023.

Baadhi ya Walimu wa Shule ya Sekondari Mangaka wakiwa katika picha ya pamoja