Waziri Ummy Mwalimu ashusha neema Nanyumbu

Posted on: December 6th, 2018

Waziri wa Afya Mhe. Ummy Mwalimu (katikati) akisalimiana na baadhi ya wananchi wa Mji wa Mangaka huku akiwa ameongozana na Mkuu wa Wilaya ya Nanyumbu Mhe. Moses Machali (Kushoto)

Na, Lunanilo L. Ngela

Waziri wa Afya, Maendeleo ya Jamii, Jinsia, Wazee na Watoto Mhe. Ummy Mwalimu (Mb) amefanya ziara ya kikazi mapema leo Tarehe 06/Disemba/2018 katika Wilaya na Nanyumbu na kuzungumza na  wananchi katika mkutano uliofanyika viwanja vya Kata ya Mangaka. Katika Ziara hiyo, Mhe. Waziri amezungumza na uongozi wa Wilaya, vyama vya Msingi vya ushirika pamoja na wananchi wote huku akitoa maelekezo mbalimbali na msimamo Serikali.

Ziara ya Mheshimiwa Ummy Mwalimu imekuwa neema kubwa kwa Wilaya ya Nanyumbu baada ya kuipatia hospitali ya Mangaka mashine ya Mionzi (X-Ray) mpya ya kisasa yenye thamani ya zaidi ya Shilingi Milioni 200 pamoja na kuahidi shilingi Milioni 100 kwa ajili ya kuunga mkono ujenzi wa maabara ya Hospitali ya Mangaka. Aidha, Mhe. Waziri ameahidi kutatua tatizo la ikama ya watumishi wa Idara ya Afya wilayani Nanyumbu kwani kuna uhaba wa watumishi hao kwa asilimia 67.

Wizara ya Afya imepongeza juhudi kubwa zinazofanywa na Rais wa Jamhuri ya Muungano wa Tanzania Mheshimiwa Dr. John Pombe Magufuli katika kuboresha Huduma za Afya kwa wananchi wote kwa kuhakikisha dawa zote mhimu zinapatikana mpaka ngazi ya zahanati. Katika Wilaya ya Nanyumbu dawa mhimu zinapatikana kwa zaidi ya asilimia 95 huku bajeti ya dawa ikipanda kutoka Milioni 76 hadi Milioni 311 mwaka huu.

Waziri wa Afya amewahamasisha wananchi kujiunga na Mfuko wa BIMA ya Taifa (NHIF) uitwao Ushirika Afya. Mfuko wa Ushirika Afya ni fao lililoanzishwa maalumu kwa ajili ya wakulima. Lengo la Serikali ni kuhakikisha inarahisisha matibabu kwa wananchi wote wakiwemo wakulima na sekta zisizo rasmi ili kuwawezesha kutibiwa katika vituo zaidi ya 6,500 nchini kote zikiwemo hospitali kubwa mfano Muhimbili. Katika Mfuko huu mwananchi atachangia Shilingi 76,800/= na kupatiwa kadi yake ya BIMA. Pamoja na faida mbalimbali za mfuko huu, watoto hawakuachwa nyuma kwani lipo fao maalumu kwa watoto ambalo mwanachama atachangia Shilingi 50,400/= na kumwezesha mtoto kutibiwa mahali popote nchini Tanzania.

Mbunge wa Jimbo la Nanyumbu Mhe. Dua Nkurua akimshukuru Waziri wa Afya kwa kukubali ombi lake la kupatiwa mashine ya Mionzi kwa hospitali ya Mangaka, amesema kuwa mashine hii ni ukombozi mkubwa kwa wagonjwa wengi wa Wilaya ya Nanyumbu ambao hulazimika kusafiri mpaka Wilaya ya Masasi ili kupata huduma.

Katika mkutano huo, Mkuu wa Wilaya ya Nanyumbu Mhe. Moses J. Machali pamoja na Mkurugenzi Mtendaji wa Halmashauri ya Wilaya ya Nanyumbu Ndg. Hamis H. Dambaya wametoa shukrani za pekee kwa Rais wa Jamhuri ya Muungano wa Tanzania pamoja na Wizara ya Afya kwa kuimarisha huduma za afya. Aidha, wameahidi kuharakisha ujenzi wa jengo la Mionzi (X-Ray room) pamoja na maabara ya hospitali ya Mangaka ili kuboresha miundombinu ya hospitali na kuongeza ufanisi wa utoaji huduma za Afya wilayani Nanyumbu.

Ofisi ya Habari Nanyumbu imezungumza na wananchi mbalimbali ambao pamoja na Shukrani zao za pekee kwa Serikali ya awamu ya tano pia wameahidi kujiunga na mfuko mpya wa Ushirika Afya ili kujihakikishia matibabu bora. Aidha, wameiomba Serikali kuwezesha upatikanaji wa maji safi na salama ili kulinda afya za wananchi.