Wazazi Nanyumbu Wasaini Mkataba wa Uwajibikaji Mbele ya DC Magala

Posted on: September 7th, 2024

Na, Lunanilo Ngela

Wazazi na walezi wa wanafunzi wa darasa la saba katika shule za msingi zilizopo kata ya Masuguru, wilaya ya Nanyumbu, wamesaini mikataba maalum ya uwajibikaji iliyotayarishwa na wilaya hiyo. Lengo kuu la mikataba hiyo ni kuhakikisha kuwa wazazi wanatimiza wajibu wao kwa wanafunzi ambao wanatarajiwa kufanya Mtihani wa Taifa wa Darasa la Saba mnamo Septemba 11-12, 2024.

Mikataba hiyo, iliyosainiwa tarehe 6 Septemba 2024 katika viwanja vya Shule ya Msingi Mtambaswala, inamtaka kila mzazi au mlezi kumpatia mwanafunzi mahitaji yote muhimu yatakayomsaidia kufanya mtihani huo kwa ufanisi. Pia, wazazi wanawajibika kuhakikisha kuwa watoto wao wanahudhuria mitihani yote bila kukosa na kuchangia chakula cha wanafunzi wakati wa kipindi cha mitihani.

Mkuu wa Wilaya ya Nanyumbu, Mheshimiwa Christopher Magala, alipokuwa akizungumza wakati wa hafla ya kusaini mikataba hiyo, alibainisha kuwa hatua hii ni sehemu ya mikakati ya wilaya kuhakikisha kuwa wanafunzi wote wanapata mazingira rafiki na salama ya kufanya mitihani yao kwa ufanisi. Alisisitiza kuwa ni muhimu kwa wazazi kuwasimamia kikamilifu watoto hao ili waweze kutimiza ndoto zao.

Aidha, Mheshimiwa Magala alitoa onyo kali kwa wazazi ambao wanaripotiwa kuwa na tabia ya kuwashawishi watoto wao kufeli kwa makusudi katika mitihani. Alieleza kusikitishwa kwake na tabia hiyo, iliyobainika katika baadhi ya maeneo ya wilaya. "Ni jambo la kushangaza na kuhuzunisha kuona mzazi anamshawishi mtoto kuandika majibu ya uongo ili afeli katika mtihani wake," alisema Mkuu wa Wilaya huku akiwakumbusha wazazi kuwa elimu ya msingi na sekondari hutolewa bure kabisa nchini Tanzania.

Vilevile, Mheshimiwa Magala alimshukuru kwa dhati Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, kwa kuhakikisha kila shule inapokea ruzuku kila mwezi ili kugharamia shughuli zote za ufundishaji na ujifunzaji.

Kwa upande wake, Afisa Tarafa ya Nanyumbu, Ndg. Livinus Mchimbi, aliwasihi wazazi kutambua umuhimu wa elimu na kuhakikisha wanatimiza wajibu wao kwa watoto. Aliwakumbusha kuwa katika msimu wa kilimo wa 2024/2025, wakulima wa wilaya hiyo walilipwa kiasi cha shilingi bilioni 38.8 kutokana na uzalishaji wa zao la ufuta, ambapo kata ya Masuguru iliongoza kwa uzalishaji katika wilaya hiyo.