Wanaoirudisha nyuma Nanyumbu watauona moto asema DC Machali

Posted on: August 21st, 2018

Mkuu wa Wilaya ya Nanyumbu Mhe. Moses Joseph Machali akitoa maelekezo kwa wakuu wa Taasisi za Umma pamoja na wakuu wa Idara na Vitengo katika ukumbi wa Halmashauri ya Wilaya ya Nanyumbu

Mkuu wa Wilaya ya Nanyumbu Mhe. Moses Joseph Machali amefanya mazungumzo na Baraza la Madiwani Nanyumbu, Wakuu wa Taasisi mbalimbali za umma, pamoja na wakuu wa Idara na Vitengo vya Halmashauri ya Wilaya ya Nayumbu. Katika mazungumzo hayo, Mkuu wa Wilaya ametoa maelekezo mbalimbali kwa viongozi wote ikiwa ni pamoja na vipaombele vya Wilaya kwa sasa. Mhe. Machali amevitaja vipaombele vitatu kuwa ni Maji, Afya na Elimu ambavyo ni lazima kwa namna yeyote vipewe uzito wa juu katika kipindi cha uongozi wake.

Huduma ya maji kwa wananchi bado ni hafifu. Mhe Mkuu wa Wilaya amempa siku nne mhandisi wa Maji wa Wilaya ya Nanyumbu kuhakikisha anampelekea mikakati ambayo Ofisi yake imeweka katika kutatua tatizo la maji kwa wakati. Aidha, Mkuu wa Wilaya ameshangazwa na kasi ndogo ya uchimbaji wa visima kwa kutumia mtambo wa Halmashauri na amewaagiza watendaji wa Idara ya maji kuhakikisha wanaongeza kasi ya uchimbaji wa visima. Mkuu wa Wilaya pia ameagiza kasi iongezwe katika utekelezaji wa miradi ya Mabwawa yatakayosambaza maji kwa wananchi ikiwa ni pamoja na kuharakisha mchakato wa kupata fedha Shilingi Bilioni 140 kwa ajili ya mradi mkubwa wa kuyatowa maji Mto Ruvuma na kuyasambaza katika vijiji.

Ujenzi wa zahanati vijijini, vituo vya afya na uboreshaji wa Hospitali ya Mangaka ni miongoni mwa maelekezo aliyoyasisitiza Mhe. Machali. Aidha, ameagiza kuwa kasi iongezeke katika ujenzi wa miuondombinu ya Afya ili kurahisisha upatikanaji wa huduma za Afya tangu ngazi ya kijiji, kata na hata Wilaya. Ujenzi huo ameagiza uende sambamba na ujenzi wa shule za msingi na Sekondari katika maeneo yasiyokuwa na shule. Wilaya ya Nanyumbu kwa Mwaka wa fedha 2016/2017 na 2017/2018 imepiga hatua kubwa katika ujenzi wa miundombinu ya shule.

Mkuu wa Wilaya akizungumzia kilimo cha korosho ametowa onyo kwa viongozi wasio waadilifu wa vyama vya msingi wanaojinufaisha kwa kuiba fedha za wakulima kuwa Wilaya haitawaacha salama. Aidha, amekemea biashara haramu inayojulukana kama "kula maua". Hii ni biashara ambayo wafanyabiashara huwarubuni wananchi kwa kuwapa fedha au vitu na kuwataka walipe korosho ufikapo msimu wa mavuno. Mtu yeyote atakaye kamatwa akifanya biashara hiyo sheria itachukuwa mkondo wake.

Baraza la Madiwani limemshukuru sana Rais wa Jamhuri ya Muungano wa Tanzania Dr, John Pombe Joseph Magufuli kwa kumteuwa Mhe. Moses Machali kuwa Mkuu wa Wilaya ya Nayumbu kwani anaendana na kasi walioihitaji kwa mda mrefu. Aidha, waheshimiwa Madiwani wamemwomba Mkuu wa Wilaya kuhakikisha anawashughulikia kikamilifu wale wote ambao kwa maksudi wanarudisha nyuma maendeleo ya Nanyumbu. Nanyumbu inahitaji maji ya kutosha, Elimu bora na Afya wanasema waheshimiwa madiwani huku wakionesha msisitizo kwa Mkuu mpya wa Wilaya .