Wadau wa Elimu Nanyumbu waifagilia Taasisi ya WAJIBU na MTWANGONET

Posted on: June 23rd, 2023

Kaimu Katibu Tawala wa Wilaya ya Nanyumbu ambaye pia ni Afisa Tarafa ya Mangaka Ndg. Baraka Mlahagwa akifungua Kikao cha Wadau wa Elimu

Na; Lunanilo Ngela

Ile kauli ya Wahenga isemayo “Mbegu ya Ufumbuzi Hupandwa Kwenye Ardhi ya Swali,” inadhihirika katika kikao cha Wadau wa Elimu kilichoketi Juni 23, 2023 katika Ukumbi wa Halmashauri kufanya tathmini ya utekelezaji wa Mradi wa Uwajibikaji Awamu ya Pili (Audit Accountability Initiative Project- Phase II), unaotekelezwa na Mashirika Yasiyokuwa ya Kiserikali ya MTWANGONET na WAJIBU kwa Shule za Msingi Magomeni na Lipupu.

Mgeni Rasmi Ndg. Baraka Mlahagwa akifungua Kikao hicho amewataka washiriki kupokea Taarifa ya Ufuatiliaji iliyoandaliwa na Wajumbe wa Kamati ya Ufuatiliaji (PETS) ikiwa ni pamoja na kuijadili taarifa hiyo na kuweka mikakati ya pamoja ya namna ya kuboresha miundombinu katika Sekta ya Elimu.

Mkurugenzi wa Shirika la MTWANGONET (Mtwara Non-Governmental Organization Network) Bi. Fidea Ruanda ameeleza kuwa, mradi huo unalenga kuongeza uwazi na uwajibikaji kwa wananchi, watendaji na viongozi katika kuboresha miundombinu ya Shule za Msingi hasa madarasa.

Naye Afisa Ufuatiliaji na Tathmini wa Taasisi ya WAJIBU Bi. Tekla Mleleu amesema, chimbuko la mradi huo ni Taarifa ya Mdhibiti na Mkaguzi Mkuu wa Hesabu za Serikali ya Mwaka 2017 iliyobainisha uhaba wa madarasa Nanyumbu na hivyo mashirika hayo kujikita katika kufanya uhamasishaji katika jamii ili kuongeza uelewa wa jamii katika kusimamia, kufuatilia na kuchangia ujenzi wa  miundo mbinu ya shule.  

Wadau wa Elimu walioshiriki kikao hicho wametoa pongezi za dhati kwa mashirika hayo ambayo katika Awamu ya Kwanza Mwaka 2021, yalitekeleza vema Mradi huo kwa Shule za Msingi Mangaka na Likokona B na hivyo kuwaomba kutekeleza miradi ya aina hiyo kwa shule zingine zenye uhaba wa miundombinu katika Halmashauri.  

Mwenyekiti wa Halmashauri ya Wilaya ya Nanyumbu ambaye pia ni Diwani wa Kata ya Masuguru Mhe. Benjamin Raphael Masimbo akizungumza na washiriki wa Kikao 

Mkurugenzi wa Shirika la MTWANGONET Bi. Fidea Ruanda akitoa Taarifa ya Utekelezaji wa Mradi kwa washiriki wa Kikao katika ukumbi wa Halmashauri

Afisa Ufuatiliaji na Tathmini wa Taasisi ya WAJIBU Bi. Tekla Mleleu akiuelezea Mradi wa Uwajibikaji Awamu ya Pili (Audit Accountability Initiative Project- Phase II)