Ujenzi wa Stendi ya mabasi Mangaka washika kasi

Posted on: September 22nd, 2018

Jengo hili ni miongoni mwa majengo yatakayojengwa katika stendi mpya ya mabasi Mangaka wilayani Nanyumbu

Na, Lunanilo L. Ngela

Wadau wa Maendeleo wilayani Nanyumbu wakiongozwa na Mkuu wa Wilaya ya Nanyumbu Mhe. Moses J. Machali wamekutana katika ukumbi wa Halmashauri ya Wilaya ya Nanyumbu ili kufanya tathmini ya kina na kupitia michoro ya Stendi mpya ya kisasa ya mabasi inayotegemea kuanza kujengwa mapema mwezi Novemba mwaka huu katika Mji wa Mangaka.

Nanyumbu ni miongoni wa Halmashauri kumi na saba (17) tu za nchi ya Tanzania zilizofanikiwa kutayarisha Miradi bora na makini ya Kimkatati na hivyo kufanikiwa kuingiziwa kiasi cha Shilingi 2,145,467,400.00 (Bilioni 2.1). Aidha, katika Mkoa wa Mtwara ni Nanyumbu pekee iliyofanikiwa kupata Mradi huu wa kimkakati.

Katika kikao hicho cha wadau wa maendeleo wilayani Nanyumbu, kampuni ya Geometry Consultant LTD ya Jijini Dar es Salaam iliyoshinda zabuni ya kutayarisha michoro na gharama za Mradi (Architects, Interior design, Landscape Consulting and Project Management) iliwasilisha michoro na uelekeo wa mradi.

Wajumbe wote wa kikao hicho wakiongozwa na Mkuu wa Wilaya ya Nanyumbu Mhe. Moses J. Machali walipata nafasi ya  kupitia michoro, kushauri na kufanya tathmini ya kina ya mradi huo mkubwa uliovuta hisia za watu wengi ndani na nje ya Wilaya ya Nanyumbu.

Ujenzi wa Stendi kuu ya mabasi Mangaka utagharimu kiasi cha Shilingi 2,245,467,400 kiasi hiki cha fedha ni kutoka katika vyanzo viwili yaani Serikali kuu Shilingi 2,145,467,400.00  na kiasi cha Shilingi 100,000,000.00 kutoka mapato ya ndani ya Halmashauri. Aidha, mradi huu unatarajia kuanza mapema mwezi Novemba 2018 na kukamilika ifikapo mwaka  2019. 

Mkuu wa Wilaya ya Nanyumbu ambaye pia ni Mwenyekiti wa kikao hicho  amesisitiza uadilifu kwa kila mmoja ambaye kwa namna moja au nyingine atahusika katika mradi huu. Mkuu wa Wilaya ameagiza pia Ujenzi wa Stendi ya mabasi uende kwa kasi inayostahili ili kuharakisha maendeleo katika Wilaya ya Nanyumbu. Pamoja na Ujenzi huu pia Wilaya ya Nanyumbu inatekeleza Mradi wa Ujenzi wa Kituo cha Afya Mtambaswala unaogharimu Shilingi 400,000,000.00 pia ujenzi wa miundombinu ya Elimu, Afya na Maji. 

Wananchi wa Wilaya ya Nanyumbu wametoa shukrani zao za pekee kwa Rais wa Jamhuri ya Muungano wa Tanzania Dr. John Pombe Magufuli kwa kuendelea kuiamini na kuithamini Wilaya ya Nanyumbu. Aidha, wametoa pongezi za dhati kwa Mkuu wa Wilaya ya Nanyumbu Mhe. Moses J. Machali, Mkurugenzi Mtendaji Ndg. Hamis H. Dambaya na watendaji wote wa Halmashauri ya Wilaya ya Nanyumbu kwa kuibua miradi mikubwa yenye tija kwa Wilaya na Taifa kwa ujumla.