Ubalozi wa Msumbiji waitembelea Nanyumbu

Posted on: March 13th, 2019

Balozi wa Msumbiji nchini Tanzania Mhe. Monica Patricio Kelement Musa (mwenye suti nyeusi) akisalimiana na baadhi ya wananchi wa kijiji cha Maratani na kushoto ni Mkuu wa Wilaya ya Nanyumbu Mhe. Moses J. Machali

Na, Lunanilo L. Ngela

Balozi wa Msumbiji nchini Tanzania Mhe. Monica Patricio Kelement Musa ameitembelea Nanyumbu mapema leo na kufanya mazungumzo na Mkuu wa Wilaya ya Nanyumbu Mhe. Moses J Machali. Katika ziara hiyo, Balozi ameongozana na maafisa kadhaa kutoka Ubalozi wa Msumbiji nchini Tanzania.

Mheshimiwa Monica Patricio Musa amesema kuwa Msumbiji inatambua na kuthamini mchango mkubwa wa Tanzania katika kupigania Uhuru wa nchi yao. Aidha, amesema kuwa Tanzania itaendelea kukumbukwa na mataifa mbalimbali ya ndani na nje ya Afrika kwa mchango wake mkubwa katika kusaidia ukombozi  wa Bara la Afrika. Amesema pia kuwa Baba wa Taifa la Tanzania Hayati Mwalimu Julius K. Nyerere hakuwa tayari kuona nchi yake ikiwa huru huku mataifa mengine ya kiafrika yakiwa utumwani.

Ubalozi wa Msumbiji umetembelea kijiji cha Maratani ambako wapo raia wa Msumbiji waishio humo na kutoa bati sitini (60) na mifuko kumi na tano (15) ya saruji kwa shule mpya ya Sekondari Maratani ili kuunga mkono juhudi za Serikali ya Tanzania katika kuhakikisha watoto wote  wanapata Elimu. Shule mpya ya Sekondari Maratani inategemea kufunguliwa wakati wowote tangu sasa baada ya kukamilika kwa baadhi ya miundombinu mhimu ya shule.

Mkuu wa Wilaya ya Nanyumbu Mhe. Moses J. Machali amewakaribisha wananchi wa Jamhuri ya Msumbiji kuja kuwekeza Nanyumbu katika nyanja mbalimbali za kiuchumi ikiwemo viwanda. Mhe. Machali amesisitiza kuendelea kudumishwa kwa amani na mshikamano ikiwa ni pamoja na kufuata taratibu za kisheria wakati wa kuvuka mpaka toka Tanzania kwenda Msumbiji au Msumbiji kuja Tanzania. Aidha, Mhe. Machali ametoa shukrani za pekee kwa Ubalozi wa Msumbiji kwa mchango wao mkubwa walioutoa kwa Shule ya Sekondari Maratani.

Ofisi ya Habari Nanyumbu imezungumza na Katibu Tawala wa Wilaya Ndg. Salum A. Palango ambaye pamoja na kuushukukuru Ubalozi wa Msumbiji amesema muda umefika sasa kwa mataifa ya kiafrika kuacha mapambano ya bunduki na kuanza mapambano ya kiuchumi ili kuharakisha maendeleo kwa wananchi. Nanyumbu imeendelea kuwa jirani mwema wa Msumbiji ikiwa ni pamoja na kushirikiana katika huduma mbalimbali za kijamii ikiwemo Afya.