"Tutachukua Hatua Kali kwa Watakaohujumu Wakulima" DC Magala

Posted on: June 9th, 2025

Mkuu wa Wilaya ya Nanyumbu akifungua mafunzo ya watendaji wa Vyama vya Ushirika

Na; Lunanilo Ngela

Mkuu wa Wilaya ya Nanyumbu, Mhe. Christopher Edward Magala, ametoa onyo kali kwa watendaji wa vyama vya ushirika watakaobainika kuwahujumu wakulima katika mchakato wa ukusanyaji, usafirishaji na uuzaji wa mazao katika msimu wa kilimo 2025/2026.

Akizungumza Juni 09, 2025 katika ukumbi wa ghala la kilimo Naishero wakati wa ufunguzi wa mafunzo ya siku moja kwa watendaji wa vyama vya msingi vya ushirika, Mhe. Magala alisisitiza umuhimu wa uadilifu na uwajibikaji katika kulinda maslahi ya wakulima.

“Tayari tumeshachukua hatua kali kwa baadhi ya watendaji waliokiuka maadili msimu uliopita. Wengine walipelekwa kwenye vyombo vya dola, na wengine waliondolewa kwenye nyadhifa zao. Mwaka huu hatutarajii kabisa kuona vitendo vya aina hiyo,” alisema Mhe. Magala kwa msisitizo.

Mafunzo hayo yaliyowaleta pamoja wenyeviti wa vyama vya msingi vya ushirika, makatibu na makarani, yalilenga kuwajengea uwezo washiriki katika maeneo mbalimbali ikiwemo ukusanyaji, uhifadhi na usafirishaji wa mazao, matumizi sahihi ya mizani, shajala na vifungashio, pamoja na elimu dhidi ya vitendo vya rushwa.

Msimu wa ununuzi wa zao la ufuta kwa mwaka 2025/2026 ulifunguliwa rasmi Juni 1, 2025, huku mnada wa kwanza kwa Chama Kikuu cha Ushirika cha Masasi na Mtwara (MAMCU) ukitarajiwa kufanyika Juni 13, 2025.