RC Sawala Aipongeza Nanyumbu kwa Kupata Hati Safi ya CAG

Posted on: June 19th, 2025

Na, Lunanilo Ngela

Mkuu wa Mkoa wa Mtwara, Mhe. Kanali Patrick Kenan Sawala, ameipongeza Halmashauri ya Wilaya ya Nanyumbu kwa kupata hati safi katika ukaguzi wa hesabu za mwaka wa fedha 2023/2024 uliofanywa na Mdhibiti na Mkaguzi Mkuu wa Hesabu za Serikali (CAG) na kuwasilishwa kwa Mheshimiwa Rais wa Jamhuri ya Muungano wa Tanzania, Dkt. Samia Suluhu Hassan.

Pongezi hizo zilitolewa Juni 19, 2025 katika Baraza Maalum la kujadili hoja za CAG, lililofanyika kwenye ukumbi wa mikutano wa Halmashauri ya Wilaya ya Nanyumbu, likiongozwa na Mwenyekiti wa Halmashauri hiyo, Mhe. Benjamin Raphael Masimbo.

Halmashauri ya Wilaya ya Nanyumbu imefanikiwa kupata hati safi kwa miaka nane mfululizo, hali inayodhihirisha uwajibikaji na usimamizi mzuri wa fedha za umma. Aidha, imesifiwa kwa kutenga na kupeleka fedha za Mfuko wa Wanawake, Vijana na Watu wenye Ulemavu, pamoja na fedha za miradi ya maendeleo kwa asilimia 100.

Katika kipindi cha miaka mitano mfululizo kuanzia mwaka wa fedha 2020/2021, Halmashauri hiyo imeongeza kiwango cha ukusanyaji wa mapato ya ndani, kutoka shilingi bilioni 2.1 hadi kufikia shilingi bilioni 4.2 mwaka 2024/2025, na hivyo kuvunja rekodi ya awali.

Kwa upande wake, Mkuu wa Wilaya ya Nanyumbu, Mhe. Christopher Magala, alisisitiza kuwa ofisi yake itaendelea kushirikiana na Halmashauri kuhakikisha kuwa miradi inayotengewa fedha inatekelezwa kwa ubora na kwa wakati ili kuleta tija kwa wananchi.