RC Sawala Aipongeza Nanyumbu kwa Kupata Hati Safi

Posted on: July 1st, 2024

Na, Lunanilo Ngela

Mkuu wa Mkoa wa Mtwara, Mhe. Kanali Patrick Kenan Sawala, ameipongeza Halmashauri ya Wilaya ya Nanyumbu kwa kupata hati safi (Unqualified Opinion) katika taarifa ya Mdhibiti na Mkaguzi Mkuu wa Hesabu za Serikali kwa mwaka wa fedha 2022/2023.

Akizungumza katika mkutano maalum wa Baraza la Madiwani Nanyumbu lililoketi Julai 1, 2024, kujadili hoja za Mdhibiti na Mkaguzi Mkuu wa Hesabu za Serikali, Mkuu wa Mkoa alieleza kuwa kazi nzuri ya watendaji wa Halmashauri, Ofisi ya Mkuu wa Wilaya, madiwani, na Chama cha Mapinduzi imewezesha Halmashauri hiyo kupata hati safi.

Mhe. Kanali Sawala alibainisha kuwa Halmashauri ya Nanyumbu imetekeleza maagizo yote tisa yaliyotolewa na Kamati ya Kudumu ya Bunge ya Hesabu za Serikali za Mitaa (LAAC). Alisisitiza kuwa utekelezaji huu ni kielelezo cha uwajibikaji mzuri.

"Halmashauri hii wamekuwa watekelezaji wa sheria, kanuni, na maelekezo ya serikali kwa kutenga asilimia 10 kutoka mapato ya ndani kwenda kwenye mfuko wa wanawake, vijana, na watu wenye ulemavu," aliongeza RC Sawala.

Aidha, halmashauri hiyo imefanikiwa kutenga fedha kutoka mapato ya ndani na kuzipeleka kwenye shughuli za maendeleo, na hivyo kufanikisha utekelezaji wa miradi mbalimbali ya maendeleo.

Nao wajumbe na wageni waalikwa katika Mkutano huo Maalum wa Baraza waliwataka watendaji wa halmashauri kuendelea kufanya kazi kwa kuzingatia sheria, kanuni, na miongozo ya serikali ikiwa ni pamoja na kutozalisha hoja mpya.