NMB Nanyumbu yapeleka madawati Michiga B

Posted on: December 5th, 2018

Mkuu wa Wilaya ya Nanyumbu Mhe. Moses J. Machali (Kushoto, walioshikana mikono) akikabidhiwa madawati na Meneja Mahusiano Serikalini wa NMB Kanda ya Kusini Ndg. Haji Msigwa

Na, Lunanilo L. Ngela

Mkuu wa Wilaya ya Nanyumbu na Mwenyekiti wa Kamati ya Ulinzi na Usalama ya Wilaya Mhe. Moses J. Machali amekabidhiwa madawati arobaini (40) na Benki ya NMB Nanyumbu yenye thamani ya shilingi milioni tano mapema leo ya tarehe 05/Disemba/2018 katika shule ya Msingi Michiga B. Benki ya NMB imetoa madawati hayo kwa ajili ya shule hiyo ili kuunga mkono juhudi za Wilaya katika kuboresha miundombinu ya shule.

Mheshimiwa Moses Joseph Machali akiwa katika makabidhiano hayo, ametoa shukrani za pekee kwa Benki ya NMB Nanyumbu kwa mchango wao mkubwa katika kuunga mkono shughuli mbalimbali za maendeleo wilayani Nanyumbu. Aidha, ameuomba uongozi wa Benki hiyo kuendelea na moyo huo wa kizalendo ili kuharakisha maendeleo ya Wilaya.

Mkuu wa Wilaya akizungumza na wananchi waliohudhuria katika zoezi hilo la kupokea madawati, ametoa shukrani za pekee kwa Mkuu wa Majeshi ya Ulinzi Tanzania Jenerali Venance S. Mabeyo pamoja na Jeshi la Wananchi wa Tanzania kwa kujenga madarasa sita mapya na Ofisi moja ya Walimu katika Shule hiyo na kuondoa kabisa tatizo la uhaba wa madarasa kwa Shule ya Msingi Michiga B. Ujenzi huu wa madarasa umefanywa na Jeshi la Wananchi wa Tanzania kwa kushirikiana na Halmashauri pamoja na wananchi.

Meneja wa Benki ya NMB Nanyumbu Bi. Rose Lwenje amesema kuwa NMB hutenga fedha kila mwaka kwa ajili ya shughuli mbalimbali za maendeleo kwa jamii ikiwemo Elimu na Afya. Aidha, Benki ya NMB Nanyumbu pamoja na kuunga mkono shughuli za maendeleo pia hutoa mikopo kwa wakulima pamoja na kuwahamasisha wananchi kujiwekea akiba benki katika akaunti mbalimbali ikiwemo akaunti za akiba, watoto na nyingine nyingi.  

Wananchi wa Kijiji cha Pachani wakizungumza na Ofisi ya Habari Nanyumbu, wameushukuru sana uongozi wa Benki ya NMB Nanyumbu kwa mchango wao mkubwa kwa shule ya Msingi Michiga B. Aidha, wameushukuru pia uongozi wa Wilaya na Jeshi la Wanachi wa Tanzania kwa kuwezesha ujenzi wa miundombinu ya shule ikiwemo madarasa na Ofisi.