Nanyumbu kuadhimisha siku ya mazingira Duniani

Posted on: June 5th, 2018

Mwakilishi wa Mkuu wa Wilaya ya Nanyumbu Ndg, Marco Mapunda akiwahutubia wananchi wa Kijiji cha Nandembo  Wilayani Nanyumbu mapema leo katika kuadhimisha siku ya mazingira Duniani.

Kaulimbiu ya mwaka huu katika siku ya Mazingira “MKAA NI GHARAMA, TUMIA NISHATI MBADALA. Kauli mbiu hii inawataka wananchi kujitoa katika utegemezi mkubwa wa kuni na mkaa ili kuingia katika teknolojia mbadala kama gesi, umeme, majiko banifu yanayotumia kuni na mkaa kidogo  ikiwa ni pamoja na mkaa utokanao na plastiki, magazeti na pumba

Afisa Misitu wa Wilaya ya Nanyumbu Ndg, Focus Mlelwa akisoma risala kwa Mgeni rasmi amesema kuwa katika Wilaya ya Nanyumbu kuna uharibifu mkubwa wa mazingira unaoendelea unaotokana na ongezeko la watu na shughuli mbalimbali za kiuchumi unaopelekea matumizi makubwa ya mkaa, kuni na mbao. Aidha, kilimo cha kuhamahama, uchomaji moto misitu na nyika pamoja na utupaji wa taka ovyo unapelekea uchafuzi wa mazingira, ukame, majangwa, uharibifu wa ardhi, upotevu wa mimea asilia, upotevu wa viumbe hai, upungufu wa maji na upungufu wa uzalishaji katika kilimo.

Afisa Mazingira wa Wilaya ya Nanyumbu Bi. Elihose Malisa amewataka wananchi, taasisi za serikali na binafsi kutilia mkazo suala la utunzaji wa mazingira kwa kuanzisha vitalu vya miti na kubuni njia mbadala ya kutengeneza mkaa, kutengeneza majiko banifu na kubuni teknolojia mbalimbali za hifadhi ya mazingira ambayo itaokoa misitu inayoporomoka siku hadi siku. Aidha, Bi Malisa amesema Serikali haitasita kuwachukulia hatua wale wote wanaochoma moto misitu ikiwani pamoja na wanaoharibu mazingira kwa makusudi. Afisa Mazingira amewakumbusha wananchi   kuhakikisha wanafanya usafi katika maeneo yao kila siku.

Wananchi wa Kijiji cha Nandembo wakizungumza na Afisa Habari wa Wilaya ya Nanyumbu ndugu Lunanilo L. Ngela wamesema wataendelea na utamaduni wakupanda miti kila mwaka ikiwa ni pamoja na kupambana na wale wote wanaochoma moto misitu au kuharibu mazingira kwa makusudi.