Nanyumbu yapongezwa kwa kupata Hati Safi Ripoti ya CAG

Posted on: June 14th, 2023

Katika picha ni Mkuu wa Mkoa wa Mtwara Mhe. Kanali Ahmed Abbas Ahmed akizungumza na wajumbe wa Baraza la Madiwani la Halmashauri ya Wilaya ya Nanyumbu

Na, Lunanilo Ngela

Mkuu wa Mkoa wa Mtwara Mhe. Kanali Ahmed Abbas Ahmed ameipongeza Halmashauri ya Wilaya ya Nanyumbu kwa kupata Hati Safi (Unqualified Audit Opinion) katika ripoti ya Mdhibiti na Mkaguzi Mkuu wa Hesabu za Serikali kwa Mwaka wa Fedha 2021/2022.

Mkuu wa Mkoa ametoa pongezi hizo mapema leo Juni 14, 2023 katika ukumbi wa mikutano wa Halmashauri, wakati Baraza Maalum la Madiwani lilipoketi kujadili Taarifa ya Mdhibiti na Mkaguzi Mkuu wa Hesabu za Serikali kwa Mwaka wa Fedha unaoishia Juni 30, 2022.

Pamoja na pongezi hizo, Mhe. Kanali Ahmed Abbas Ahmed ameiagiza Halmashauri ya Wilaya ya Nanyumbu isimamia kikamilifu ukusanyi wa mapato, usimamizi wa miradi ya maendeleo, kuzuia hoja za ukaguzi, kubuni vyanzo vipya vya mapato pamoja na kuhakikisha inaweka mfumo Madhubuti wa kusimamia mashine za ukusanyaji wa mapato (POS).

Aidha, Mkuu wa Mkoa amewataka watumishi wa Divisheni ya Afya kujengewa uwezo wa namna ya kujaza vyema fomu za madai ikiwemo madai kwenda Bima ya Afya (NHIF) ili kuhakikisha fedha hizo zinalipwa kikamilifu kwenye vituo vya kutolea huduma za Afya.

Nae Kaimu Mkuu wa Wilaya ya Nanyumbu ambaye pia ni Mkuu wa Wilaya ya Masasi Mhe. Lauter John Kanoni pamoja na kuipongeza Halmashauri kwa kupata hati Safi pia amesisitiza hoja zilizobaki kufungwa kabla ya Septemba 30, 2023.

Mkutano Maalum wa Baraza la Madiwani kujadili Taarifa ya Mdhibiti na Mkaguzi Mkuu wa Hesabu za Serikali (CAG), hufanyika kila Mwaka baada ya Ripoti ya Mdhibiti na Mkaguzi Mkuu wa Hesabu za Serikali kuwasilishwa kwa Rais wa Jamhuri ya Muungano wa Tanzania kwa mujibu wa Ibara ya 143(4) ya Katiba ya Jamhuri ya Muungano wa Tanzania ya Mwaka 1977, na Kifungu cha 34 cha Sheria ya Ukaguzi wa Umma, Sura ya 418 na kuwasilishwa bungeni kwa ajili ya kujadiliwa na Kamati za Kudumu za Bunge.

Mwenyekiti wa Halmashauri ya Wilaya ya Nanyumbu ambaye pia ni Diwani wa Kata ya Masuguru Mhe. Benjamin Raphael Masimbo akifungua Mkutano Maalum wa Baraza la Madiwani

Kaimu Mkuu wa Wilaya ya Nanyumbu ambaye pia ni Mkuu wa Wilaya ya Masasi Mhe. Lauter John Kanoni akizungumza na wajumbe wa Baraza Maalum la Madiwani

Katika picha ni Mkurugenzi Mtendaji wa Halmashauri ya Wilaya ya Nanyumbu Ndg. Ibrahim John Mwanauta akizungumza katika mkutano wa Baraza Maalum la Madiwani

Kaimu Mkaguzi Mkuu wa Nje Mkoa wa Mtwara Bi. Janeth Kikoti akiwasilisha Taarifa ya Mdhibiti na Mkaguzi Mkuu wa Hesabu za Serikali katika Baraza Maalum la Madiwani 

Mweka Hazina wa Halmashauri ya Wilaya ya Nanyumbu CPA (T) Zauda F. Fundi akiwasilisha kwa niaba ya Mkurugenzi Mtendaji Taarifa ya Mdhibiti na Mkaguzi Mkuu wa Hesabu za Serikali kwa ajili ya kujadiliwa na wajumbe wa Baraza Maalum la Madiwani

Madiwani wa Halmashauri ya Wilaya ya Nanyumbu wakiwa katika Mkutano Maalum wa Baraza la Madiwani kujadili Taarifa ya Mdhibiti na Mkaguzi Mkuu wa Hesabu za Serikali